De Videos von onsen dreedoagschen Kongress jinjen ons sea to Hoaten un dee holpen ons de biblische Lieren bäta to vestonen. Fa dän dreedoagschen Kongress 2020 “Freit junt emma”! jeef daut 114 Videos, wua uk de 53 Räden met en wieren, waut de Breeda vom Väastaunt un dee äare Helpa hilden. Hast du mol jewundat, woo väl Oabeit daut es un woo väl daut kost, soone Videos to moaken?

 Meist 900 Breeda un Sestren von oppe gaunze Welt haben bie dän Kongress metjeholpen. Em gaunzen wieren daut twee Joa, waut dee aun de Videos fa dän Kongress schauften. Daut sent meist 100 000 Stund. Doa sent uk de 70 000 Stund met en, waut daut dieed, daut 76-minutsche Video von de Bibeltiet to moaken Nehemia: “De Freid aun Jehova es waut junt stoakj moakt”.

 Secha kjenn jie junt väastalen, daut doa een deel Kosten met en wieren, fa aul de friewelje Methelpa to sorjen, fa aul daut Jereetschoft opptokomen un aul de Sachen opptostalen, waut daut brukt, om dise Videos to moaken.

 Jared Gossman, waut bie de Audio- un Video-Deensten schauft, säd: “Daut Liakommitee von dän Väastaunt es sea doarom todoonen, daut en onse Videos de veschiedne Kultuaren un Städen jewäsen woaren. Daut es, wäajen wie eene Famielje sent von Breeda un Sestren oppe gaunze Welt, un daut saul aun de Videos to seenen sennen. Un daut daut bie dit besondre Woakj mäajlich wia, schauften 24 Gruppen Breeda von 11 veschiedne Lenda toop. Daut Breeda un Sestren oppe gaunze Welt soo toopschaufen kjennen, mott doa väl jeplont un daut brukt uk een deel Jelt.”

 Toom väle von onse Videos moaken, brukt daut uk uzhent Jereetschoft un Sachen, waut doa oppjestalt motten. Biejlikj om daut Video to moaken Nehemia: “De Freid aun Jehova es waut junt stoakj moakt” worden de Sachen en daut Mount-Ebo-Jebied oppjestalt, waut dicht bie Patterson, New York, Stäts, es. Om de friewelje Gowen rajcht to brucken, deeden de Breeda Sachen von Holt toopdeschren, waut leicht wieren, un daut et sull no de Mieren von daut ieeschtemmasche Jerusalem loten un soo aus dee daut to dee Tiet hauden. Daut wieren groote heltane Främs von 6 Meeta (20 Schoo) huach, waut dan met Spunkasch betrocken worden un dan soo jefoaft, daut et no Steena leet. Dise Wenj kunnen leicht omjeriemt woaren, soo daut dee kunnen fa de veschiedne Poats von daut Video jebrukt woaren. Daut kost doawäajen noch meist 100 000 stätsche Dolla, om aul de Sachen to moaken un opptostalen, waut fa daut Nehemia-Video needich wieren. a

 Aul dise Eenselheiten to weeten, waut doa met en wieren, halpt ons, daut wie noch dankboara sent fa dän dreedoagschen Kongress dit Joa. Wie sent ons secha, daut aul de Oabeit, waut doa jedonen wort toom disen Kongress foadich moaken, doatoo fieet, daut Jehova oppe gaunze Welt jeloft woat. Dankscheen fa aul june friewelje Gowen, waut jie fa daut Woakj oppe gaunze Welt jejäft haben derch donate.pr418.com un opp aundre Wäaj.