Jatun asambleapa videucunaga shongunchicunamanmi chayaycun y yanapamanchi Bibliata shumaj tantiarcunapaj. 2020 wata, “¡Imaypis cushicäriy!” jatun asambleapa 114 videucuna ruracämushga y 43 videucuna cargan Jehovapa testiguncunata Pushajcunapa y yanapacojnincunapa discursuncunami. ¿Imaylapis tapucushcanquichu ayca tiemputa y ayca guellaytapis gastargan cay videucunata ruracänanpaj?

 May chay sitiucunapita 900 hermanucunano alapami arupäcurgan cay asambleapa programanta shumaj rurapäcunanpaj. Cay ruraycunachoga ishcay watacunami arupäcurgan. Nehemías: “Jehová cushicuyta gomaptinchiraj laquicuy aywacun” dramaga 76 minutucunayojmi, y chayta rurananpäga chaychicaj horacunami arupäcurgan. Cay ruraycunacho hermanunchicuna arupäcushganta yuparga 100.000 horacunano cashga.

 Lapan arojcunata cuidananpaj, maquinacunata tarinanpaj y drama maycho ruracänanpaj imayca necesitashgancunata rantinanpäga, achca guellaytarämi necesitargan.

 Jared Gossman yanapacun Servicios de Audio y Video nishgancho, payga nin: “Yachachicuycunata ruraycho yanapacoj hermanucuna munargan tucuy sitiucunachomi videucunata grabacänanpaj, chaynopa may chaychomi caycaj hermanunchicunata ricänapaj. Y chayta logranapäga, lapancuna juc yarpaylawanmi arupäcurgan y shumaj camacächirgan imano jucnin jucninpis yanapanacärinanpaj, paycunaga 11 naciuncunachomi arupäcurgan”.

 Achca videucunata ruracänanpaj imayca maquinacunata y tucuy sitiucunatapis necesitargan. Tantiarinapaj, Nehemías: “Jehová cushicuyta gomaptinchiraj laquicuy aywacun” dramaga, Mount Ebo nishgan sitiuchomi juc localta sharcachirgan grabananpaj, cayga Estados Unidos naciunchomi caycan. Cay drama Biblia wilacushganno cananpaj y guellayta alapa mana gastananpäga, hermanucuna Jerusalenpa murallancunata unay cashganno sharcachipäcurgan, y chaypäga ancash tablacunatami utilizargan perga nirajta sharcachinanpaj. Chaycunaga 6 metrucunami wichaypaj cargan y tablacunataga rasunpa rumi niraj pinturawanmi pintargan perga niraj ricacäcunanpaj. Chaurasga ancashla captinmi caypa wacpa cuyuchej tucuynopa videucunata grabananpaj. Chayno captinpis, cay ruraycunachoga 100.000 dólares gastargan. a

 Cay watapaj jatun asamblea ruracänanpäga, hermanunchicuna alapami arupäcurgan y achca guellaytapis gastargan, cayta musyarga alapami valurananchi y agradecicunanchi. Seguro caycanchi cay ruraycunawanmi pï maypis Taytalanchi Jehovata alabarcunanpaj. Päquila ali shongulayquiwan guellayniquita apachicamushgayquipita donate.pr418.com paginacho y jucnopapis.