Asamblëantsikkunachö rikanqantsik videukunaqa, shonquntsikyaqmi chärin y Bibliapita mas yachakunapaqmi yanapamantsik. 2020 wata “¡Kushishqa kashun!” neq asamblëachöqa, 114 videukunam kashqa. 43 videukunachöqa Testïgukunata Pushaqkunawan yanapaqninkunam yachatsikayämurqan. ¿Tsëkunata rurayämunampaq imëkata rurayanqanta y ëkata gastayanqanta musyankiku?

 Kë videukunata rurarqa, entëru patsapita 900 wawqi panikunam yanapakuyarqan. Tsëtaqa rurar ushayarqan ishkë watachöraqmi, y tsë ishkan watachöqa mëtsika hörakuna o cäsi 100.000 hörakunam trabajayarqan. Nehemïas: Kushishqa kanapaq Jehovä yanapamashqam alli tsarakuntsik neq videuta rurayänanllapaqmi 70.000 hörakuna trabajayarqan.

 Tsëkunata rurar yanapakoqkunata atiendiyänampaq, cösaskunata rantiyänampaq y llapanta patsätsipakuyänampaqqa atska qellëtaran gastayarqan.

 Videukunata rurayanqan Betelchö yanapakoq wawqi Jared Gossmanmi nin: “Testïgukunata Pushaqkunaqa munayan, tsë videukunachö më tsëpita wawqi panikuna yarquyänantam. Juk markakunapita wawqi panikunata rikarmi mas kushishqa yachakuntsik. Tsëpaqqa 11 nacionkunachömi atskaq yanapakuyarqan. Tsëkunata rurayänampaqqa, imëkatam patsätsipakuyarqan y atska qellëtam gastayarqan”.

 Wakin videukunata rurayänampaqqa tukuy mäquinakunatam utilizäyarqan, y unë witsannö rikakunampaqmi imëkata rurayarqan. Nehemïas: Kushishqa kanapaq Jehovä yanapamashqam alli tsarakuntsik neq videuta rurayanqanman yarpärishun. Yanapakunapaq churanqantsik qellëta alli utilizäyänampaq y Biblia ninqannölla kanampaqmi, wawqi panikunaqa imëkata shumaq patsätsipakuyarqan. Unë witsan Jerusalen marka imanö kanqanta rikätsikuyänampaqmi, qerupita rumi niraqta rurayarqan. Y tsë rurayanqan alläpa mana lasaptinmi, juk videukunata rurayänampaqpis tsëllata utilizäyarqan. Tsënö kaptimpis 300.000 sölispitapis mastam gastayarqan. Tsë llapantaqa, Estädus Unïduschömi rurayarqan. a

 Këkunata musyanqantsikmi yanapamantsik, kë wata asamblëantsikta shumaq wiyakunapaq. Asamblëantsikkunaqa Teyta Jehoväta mas kuyanapaqmi yanapamantsik. Tsëmi “gracias” niriyaq, donate.pr418.com päginapa y juknöpapis qellënikikunata churakur yanapakuyanqëkipita.