Reka tikai tatou te akara i te au vitio uruoaanga tapere e kua mārama tatou i te au apiianga Pipiria. I teia 2020 “E Rekareka”! Uruoaanga Tapere, e 114 vitio, e 43 ako anga tei orongaia e te Pupu Akaaere e to ratou tauturu. Kua akamanako ainei koe te maata o te moni e te maroiroi no te maani i teia au vitio.

 Vaitata i te 900 au taeake e te au tuaine i te ao katoa tei oronga i to ratou taime e te karape kia raveia teia porokaramu. Kua akapou ratou e 100,000 ora e tere atu i te rua mataiti. E 70,000 ora no te akaoti i te 76 miniti nuku Pipiria Nehemiah: “The Joy of Jehovah Is Your Stronghold.”

 Kua taangaangaia tetai au moni no te au ngai nooanga e te akono i te au taeake tei inangaro i te tauturu pera katoa te au apinga uira, te au matini, e te au opati no te akaoti i teia angaanga.

 “Inangaro te Kumiti Apiianga o te Pupu Akaaere kia akaariia te au iti tangata tukeke e te au ngai ke ke i roto i ta tatou au vitio. Ka akaari teia i te akataeake anga i te ao katoa,” i akakite ei a Jared Gossman o te Audio/Video Services. “E 24 pupu i roto i te 11 au enua tukeke tei angaanga kapiti no te akaoti i teia angaanga. Kua anoanoia te tauturu i te ao katoa, te au moni tauturu, te paranianga, e te akatereanga no te akaoti i teia angaanga.”

 Kua anoano katoaia tetai au apinga takake e te au akanoonoo anga no te maani i teia au vitio. Ei akaraanga, kua akapapaia te nuku Nehemiah: “The Joy of Jehovah Is Your Stronghold” ki roto i te Mt. Ebo studio i te pae ia Patterson, New York, Marike. Kia taangaanga meitaki i te au moni tei orongaia mai ei akameitaki i te teata, kua akatu te au taeake i tetai patu ei akatutu i te au patu o Ierusalema i taito. Kua akatuia tetai paruru rakau e ono mita (20 tapuae) te teitei e kua tapokiia ki te foam mei te toka te akaraanga. Ka rauka teia “au patu” i te akanekeia no te au akatutuanga tukeke, kia māmā mai te angaanga. Vaitata i te $100,000 moni Marike tei anoanoia no te akatu i teia au patu no te nuku. a

 No teia au angaanga tei tupu, mareka tikai tatou i te porokaramu uruoaanga tapere i teia mataiti. Papu ia tatou e kua riro teia au angaanga ei akapaapaa ia Iehova. Meitaki maata no ta kotou moni oronga ua ki te donate.pr418.com e te vai atura no te au angaanga i te ao katoa.