Echi videos japi buyaa echoná napawíliwami tamó iʼwiri jiti ta aʼlá moʼabo ne sulachí jona japi aní echi Biblia. Echoná waʼlú napawíliwami 2020 “¡Sinibí ne wabé kanílasi!” a nirú 114 videos, nalí 43 ko ju nawésali japi nijí japi Aʼlá Niseri alí echi hermanos japi iʼwiri. ¿Ami machinali chu yena nóchili alí chu ikí winomí suwía niwalia echi videos?

 Ne nokí 900 hermanos omáana Wichimóbachi nikúurili niwayá echi videos japi nirúlima echoná napawíliwachi. Okuá bamíali nokali niwayá jepuná nóchali, ne nokí 100,000 horas nokali. Echi hermanos ko 70,000 horas nokali niwayá echi video Nehemías: Tamujé ko kanili jiti Jeobá tamó iʼwiri.

 Jiti iyama suwaba echi namuti japi newalé echi nóchami, alí ayénachó raliwá echi namuti japi riká máquinas alí cámaras, a suwíali wiká winomí.

 Echi hermano Jared Gossman japi nocha echoná Audio alí Video, jéaní: “Echi Comité de Enseñanza nakí japi echoná videos machíinima hermanos sinéami kawichí piréami. Echi riká newaré japi ta napawika nocha. Jiti bela, 11 países, 24 equipos napawika nóchali niwayá echi videos. A newaleli wiká winomí alí napawika nocha”.

 Jiti niwama wiká videos, a newaleli echi hermanos japi we aʼlá machí nochia. Jiti niwama echi video Nehemías: Tamujé ko kanili jiti Jeobá tamó iʼwiri, echi hermanos aʼlárika wilali echoná Mount Ebo japi mulipi wilí echomí Patterson (Nueva York). Jiti we aʼlá néema echi winomí, echi hermanos ko niwali echi pared japi riká Jerusalén nili chabé. Ibili pared 6 metros (20 pies) ripá nili alí madera jitra niwárami nili, nalí echi hermanos niwali japi riká ko rité jitra niwárami ka. Jepuná paredes a omérili iyea alí sinúrika ku wilayá. Niwaliwa jepuná paredes a suwíali winomí nokí 100,000 dólares. a

 Machiwá suwaba jepuná namuti, ati we natéami niraa inepo echi waʼlú napawíliwami na bamíali. Ati machí japi nokali echi hermanos jiwérika nokayá wiká pagótami jenaʼí Wichimóbachi piréami a binénilima Jeobá jitra. Waʼlú matétarabá jiti timí nijili echi winomí echoná página internet donate.pr418.com.