Mavidiyo nga unganu wachigaŵa ngatitifika pamtima ndipuso ngatitiwovya kuvwisa umampha vo Bayibolu likamba. Unganu wachigaŵa wa 2020 wakuti “Mukondwengi Nyengu Zosi”! wenga ndi mavidiyo 114, kusazgiyapu nkhani 43 zo zingukambika ndi abali a mu Wupu Wakulongozga ndipuso abali wo atiŵawovya. Kumbi mukuŵanaŵaniyapu ntchitu yo yengapu kweniso ndalama zo zingugwira ntchitu kuti mavidiyo ngenanga nganozgeki?

 Abali ndi azichi ŵidu pafufupi 900 pacharu chosi angugwiriskiya ntchitu nyengu yawu kweniso lusu lawu pakunozga pulogilamu yeniyi. Kuti ntchitu iyi yimali pangujumpha vyaka viŵi ndipuso abali angugwira ntchitu iyi kwa maola pafufupi 100,000. Venivi visazgiyaku maola 70,000 ngo ngakhumbikanga kuti amalizi kunozga vidiyo ya mu Bayibolu yaku Nehemiya yakuti: “Likondwa Lo Yehova Wapereka Ndilu Malu Nginu Ngakuvikilirika.”

 Nge po mwawone, pakhumbikanga ndalama zinandi kuti ziwovyi abali ndi azichi wo angujipereka kugwira ntchitu yeniyi. Pakhumbikanga ndalama zinandi zakunozge malu ndipuso zakuguliya vipangizu vasonu.

 Mubali Jared Gossman yo wateŵete mu Dipatimenti Yakujambula Mavidiyo wangukamba kuti: “Komiti Yakuwonere Ntchitu Yakusambiza ya Ŵupu Wakulongozga yikondwa ukongwa asani mavidiyo ngidu musanirika ŵanthu a midawuku kweniso mitundu yakupambanapambana. Venga viyo chifukwa gulu lidu ndapacharu chosi, ndipu takhumbanga kuti vinthu venivi viwonekengi mumavidiyo ngenanga. Kuti tifiski venivi, penga magulu 24 nga ŵanthu akutuliya mu vyaru 11 vakupambanapambana ndipu angugwiriya limoza ntchitu yeniyi. Ntchitu yeniyi kuti yiyendi umampha pakhumbikanga ndalama zinandi, kunozgeke mwakukwana ndipuso kuchita vinthu mwakukoliyana.”

 Pakupanga mavidiyo ngidu nganandi pakhumbika vipangizu vapade kweniso vipenjeka kuŵikika mwandondomeku. Mwakuyeruzgiyapu, vigaŵa vakupambanapambana vo ve muvidiyo ya mutu wakuti Nehemiya: “Likondwa Lo Yehova Wapereka Ndilu Malu Nginu Ngakuvikilirika” vingujambulikiya mu situdiyo yaku Mt. Ebo yo ye kufupi ndi Patterson ku New York, U.S.A. Kuti tigwiriskiyi ntchitu mwakwenere ndalama zo abali apereka mwakukhumba kwawu po titesesa kuti vinthu vo ve muvidiyo viwonekengi nge mo vawonekiyanga mu nyengu yeniyo, abali angupanga mpanda wa mathabwa ngakupepuka wo wawonekanga nge mpanda wakali wa Yerusalemu. Thabwa lelosi lo angupangiya mpanda uwu lenga la mamita 6 ndipu angulipaka penti kuti liwonekengi nge mya. Mpanda wenuwu awunderezanga asani ajambula vigaŵa vakupambanapambana va vidiyo. Venivi vinguwovya kuti aleki kupenja malu nganandi ngakujambuliyaku. Chinanga kuti veviyo, ndalama pafufupi madola 100,000 nga ku America ndizu zingugwiriskikiya ntchitu pakunoza malu ngakujambuliyaku vidiyo yaku Nehemiya pe. a

 Kuziŵa venivi kutitichitiska kuti tiwongengi ukongwa pulogilamu ya unganu wachigaŵa wa chaka chinu. Tigomezga kuti phamphu lo abali ndi azichi ŵenga nalu pakunozga pulogilamu ya unganu wenuwu lawovya kuti ŵanthu pacharu chosi athamiki Yehova. Titikuwongani chifukwa cha kupereka ndalama zakovya pa ntchitu yapacharu chosi kuziya pa donate.pr418.com kweniso nthowa zinyaki.