Mavidiyo ngotweebelela lyamuswaangano wacooko alatusika amoyo alimwi alatugwasya kumvwisya ncoliyiisya Bbaibbele. Muswaangano wacooko wamu 2020 ujisi mavidiyo aali 114, kubikkilizya amakani aali 43 aakapegwa abamu Kabunga Keendelezya alimwi abasikubagwasyilizya. Sena kuli nomwakalibuzyide kale kujatikizya mbouli mupati mulimo ooyu alimwi amali aakabelesyegwa kutegwa mavidiyo aaya apangwe?

 Bakwesu abacizyi babalilwa ku 900 munyika yoonse bakaaba ciindi alimwi aluzyibo lwabo kutegwa bagwasyilizye mumulimo ooyu. Bakabelesya mawoola aabalilwa ku 100,000 mumyaka yiinda kuli yobilo. Mawoola aaya alabikkilizya amawoola aali 70,000 aakabelesyegwa kupanga vidiyo yamaminiti aali 76 iiyeeme aa Bbaibbele yakuti: Nehemiya: “Lukkomano lwa Jehova Ndolumuyumya.”

 Kwakali kuyandika mali manji kapati kutegwa basikulisungula aaba balanganizyigwe. Kunze lyaboobo, bakeelede kupegwa zibelesyo alimwi akujaninwa masena kwakucitila mulimo wabo.

 Mukwesu Jared Gossman, uubelekela ku Audio/Video Services wakaluula kuti: “Makanze aabamu Kkomiti ya Kabunga Keendelezya Iilanganya Ziyiisyigwa ngakubikkilizya zilengwa ziindene-indene alimwi amasena aaindene-indene mumavidiyo eesu. Cili boobu akaambo kakuti tuli babunyina banyika yoonse, aboobo eeci ceelede kulibonya mumavidiyo eesu. Lino kutegwa cicitike eeci, matiimu aali 24 muzisi zili 11 akapegwa mulimo ooyu. Pele kwakali kuyandika mali manji, kupulana, alimwi akubelekela antoomwe kutegwa weende kabotu mulimo.”

 Mavidiyo eesu manji ayandika mincini yaalubazu alimwi amasena aalubazu. Mucikozyanyo, busena ibwakabelesyegwa muvidiyo yakuti Nehemiya: Lukkomano lwa Jehova Ndolumuyumya” bwakayakilwa mukati musitudiyo iili ku Mt. Ebo kufwaafwi aku Patterson, New York, U.S.A. Kutegwa baabelesye kabotu mali aasangwa, pele aciindi nciconya bape kuti vidiyo ilibonye kuti itondezya zyakali kucitika kaindi alimwi munzila iiluzi, bakwesu bakapanga bwaanda buuba-uba ibulibonya mbuli kuti mbwaanda bwa Jerusalemu yansiku. Bwaanda abumwi bwakapangidwe afulemu yamapulanga iisika ku 6 mita kulampa, mpoonya bakabubikka cibbokesi cipentedwe mbuli mabwe. Bwaanda oobu bwakali kunyamunya akubikkwa abusena bumwi, kutegwa bacesye mweelwe wazintu zyakali kuyandika. Nokuba boobo, kwakali kuyandika mali aabalilwa ku $100,000 (U.S.) kutegwa bapange buyo vidiyo yomwe. a

 Kuzyiba twaambo ootu kupa kuti tuyungizye kulumba kwesu kujatikizya muswaangano wacooko wamwaka uuno. Tulaalusyomo lwakuti mulimo iwakabelekwa kutegwa muswaangano uzwidilile ulapa kuti nyika yoonse imutembaule Jehova. Tulamulumba kapati akaambo kakusanga kuzwa ansi aamoyo kumulimo wanyika yoonse kwiinda mukubelesya donate.pr418.com alimwi anzila zimbi.