Bideuecha engaksï kʼéri tánguarhikuecharhu rejioniri uérajka mintsitarhujtsïni niárachesïndi ka jarhuatasïndijtsïni parachi sánderu sési kurhanguni ambe enga Biblia jorhentpijka. Kʼéri tánguarhikua rejioniri 2020 “¡Méntkisï tsípi je!” jarhastiksï 114 bideuecha ka 43 ícheri jindeestiksï arhijtsïkperatecha engaksï nitamataraaka imeecha engaksï Grupurhu jaka enga Orhejtsïkuajka iámindu kúnguarhikuechani ka imeeri jarhuajpiricha. ¿Ménisïjtsï kurhamarhikuarhiski na xáni ánchikuarhinhasïni ka tumina úrakuarhesïni para i járhati bideuechani uaani?

 Sáno 900 erachicha iápuru parhakpini anapuecha úrastiksï imeecheri tiempu ka ambe engaksï jorhenaka úni paraksï úni ini programa kʼéri tánguarhikueri. I erachicha sánoksï 100,000 ora ánchikuarhisti ini tsimani uéxurhini jimbo enga durarika i ánchikuarhita. Kuenta úparini ini 70,000 orechani enga úrakuarhika para úni bideuni enga bibliarhu pʼitakata jaka enga 76 minutu durarijka, enga arhinhajka Neemiasi: Tsípikuarhita enga Jeobani jimbo jurhajka jindesti juchari uinhapikua.

 Ísïisti, kánikua sentabu úrakuarhesïndi para kuidariuani ini erachichani, jatsiani ekipuechani ka nani engaksï ánchikuarhiaka parakaksï uaaka ini ánchikuarhitani úni.

 Jared Gossman enga Audiu ka Bideurhu jarhuajpejka, uandasïndi: “Komite Jorhentperakueri Grupueri enga Orhejtsïkuajka iámindu kúnguarhikuechani uékasïndi eska mámaru járhati lugaricha ka kulturecha jauaka juchaari bideuecharhu ka ísïksï úsïndi xarharani bideuecharhu eskachi erachicheska engachi iápuru parhakpinirhu jaka. Para úni i ambe, 24 ekipuecha 11 paisiri márkuksï ánchikuarhisti ini ánchikuarhita jimbo, ka ísï jimbo uétarhisïreendi kánikua sentabu ka eskachi exepiringa eskaksï úpiringa iáminduecha sési ánchikuarhini”.

 Para uáni uánikua juchaari bideuechani uétarhisïreendi uánikua ambe engaksï no xáni úrakuarhejka ka mámaru ambe para sési xarharani. Pori ejemplu para úni grabarini bideuni enga bibliarhu pʼitakata jaka, Neemiasi: Tsípikuarhita enga Jeobani jimbo jurhajka jindesti juchari uinhapikua, ústiksï iámindu ambe enga uétarhipiringa para grabarini jini estudiu de Mount Ebo, Patterson no iauani (Nueva York). Ka para sési úrani sentabu enga íntspinhajka ka ístu para úni eska májkueni xarharapiringa eska ióntki, erachichaksï uaasti bardechani engaksï no k’uetsapenga ka engaksï ísï xarharenga eska bardecha ióntki anapu ireta Jerusaléniri. Mándani barda 6 metru iótaspti ka úkata jarhaspti chkariri enga atarhikata japka ambe ma jingoni enga no k’uetsapipka ka enga ísï xarharenga komueska tsakapu, ka i bardechanksï úsïreendi móskuani paraksï máteru ambe úntani ka ísï nóteru uétarhistia mámaru ambe úni. Nájkiruka ísï, para solu ini ambe úni jukari 100,000 dolari úrakuarhisti. a

 Míteni i ambe úsïndi eskachi sánderu jukaparharaaka k’éri tánguarhikua rejioniri i uéxurhini anapu. Seguruchi jarhaska eska i ánchikuarhita enga úkuarhijka uaaka eska k’éri ambe arhinhaaka Jeoba interu parhakpinirhu. Diosmaiamu je engajtsï tsípikua jingoni íntspijka sentabu para ánchikuarhita enga interu parhakpinirhu úkuarhijka, úraparini donate.pr418.com ka úraparini máteru ambe para íntspini sentabu.