Mavidiyo agho tikuwonelera pa ungano wa chigaŵa ghakutifika pa mtima ndipo ghakutovwira kuti tipulikiske makora ivyo Baibolo likusambizga. Ungano wa Chigaŵa wa 2020 wakuti, ‘Sekelerani Nyengo Zose’! uli na mavidiyo 114. Chiŵelengero ichi chikusazgapo mavidiyo gha nkhani 43 izo ŵabali ŵa mu Wupu Wakulongozga na awo ŵakovwira mu makomiti ghakupambanapambana ŵakayowoya. Kasi muli kujifumbapo kuti, chikuchitika ntchivichi pakupanga mavidiyo agha, kweniso pakunjira ndalama zilinga?

 Ŵabali pafupifupi 900 ŵakufuma mu vyaru vyakupambanapambana, ŵakajipeleka kuti ŵawovwirepo pa kunozga pulogiramu ya ungano uwu. Wose pamoza ŵakamalira maora pafupifupi 100,000 kweniso vyaka vyakujumpha viŵiri kuti ŵanozge pulogiramu iyi. Nyengo iyi yikusazgapo maora 70,000 agho ŵakamalira pakujambura vidiyo ya maminiti 76 ya Nehemiya: “Chimwemwe cha Yehova Ni Nkhongono Zinu.”

 Kuyowoya unenesko, pakakhumbikwanga ndalama zinandi kuti tiŵape vyakukhumbikwa pa umoyo awo ŵakajipeleka kovwirapo pa mulimo uwu, kweniso kuti tiŵape vinthu vyakugwilira ntchito vyakovwira kuti ntchito iyi yende makora.

 Jared Gossman, uyo wakuteŵetera mu Dipatimenti ya Mavidiyo wakati: “Komiti Yakusambizga ya Wupu Wakulongozga yikukondwa chomene para mu mavidiyo mukuŵa ŵanthu ŵa mitheto kweniso ŵakufuma mu vigaŵa vyakupambanapambana. Ivi vikovwira kuti mavidiyo ghithu ghalongorenge ubali withu wa pa charu chose. Kuti tifiske ivi, matimu 24 agho ghali mu vyaru 11 ghakagwira ntchito iyi mwakukolerana. Kuti tipange mavidiyo agha pakakhumbikwanga ndalama zinandi, kupanga mapulani, na kugwira ntchito mwakukolerana.”

 Kuti tipange mavidiyo ghithu ghanyake, pakukhumbikwa vinthu vinyake kweniso malo ghapadera. Mwachiyelezgero, malo agho tikajambulirako vidiyo ya Nehemiya: “Chimwemwe cha Yehova Ni Nkhongono Zinu,” ghakazengeka mukati mwa malo agho tikujambulirako mavidiyo ku Mt. Ebo, kufupi na Patterson, New York, U.S.A. Kuti tigwiliskire ntchito makora vyawanangwa ivyo ŵabali ŵakupeleka, kweniso kuti tijambure vidiyo iyo yikulongora umo malo na ŵanthu ŵakale ŵakawonekeranga, ŵabali ŵakapanga vinthu vipepu vyakuŵa nga ni viliŵa ndipo vikawonekanga nga umo viliŵa vyakale vya Yerusalemu vikawonekeranga. Vinthu ivyo ŵakapanga, chilichose chikaŵa na mafulemu gha mathabwa agho ghakaŵa ghatali mamita 6 ndipo ŵakavipenta kuti viwonekenge nga ni libwe. Viliŵa ivi vikaŵa vyakuti ŵangavinyamura kuti vikhale malo ghakupambanapambana agho ŵakajambulirako vidiyo iyi. Ivi vikawovwira kuti ŵaleke kusuzgika kupenja malo ghanandinandi gha kujambulira vidiyo iyi. Nangauli vikaŵa nthena, kweni pakakhumbikwanga ndalama pafupifupi $100,000 (U.S.) kuti tizenge malo gha kujambulirako vidiyo yikuru iyi. a

 Kumanya vinthu ivi kukutovwira kuti tiwongenge chomene pulogiramu ya ungano wa chigaŵa wa chaka chino. Tikugomezga kuti vinthu vyose ivyo vikachitika pa kunozga pulogiramu ya ungano iyi, viwovwirenge kuti ŵanthu ŵanandi pa charu chose ŵalumbe Yehova. Tikumuwongani chomene chifukwa cha vyawanangwa ivyo mukupeleka kuti viwovwire pa ntchito ya kupharazga ya pa charu chose kwizira pa donate.pr418.com na nthowa zinyake.