Ividio re niri vwẹ eghwẹkoko avwanre te avwanre ẹwẹn, e je vwẹ ukẹcha kẹ avwanre vwo vwo ẹruọ rẹ iyono ri Baibol na kpobarophiyọ. Ọghwẹkoko ri “Ghọghọ Ọkieje”! ri 2020 na vwo ividio ri te 114 vẹ eta ri te 43 rẹ Ẹko Rọvwẹrote na vẹ iniọvo re vwẹ ukẹcha vwọ kẹ ayen vwọ phia. Wọ vwẹ ẹwẹn roro owian vẹ igho ra ghwọrọ phiyọ eruo rẹ ividio na jovwo re?

 Iniọvo rẹ eya vẹ eshare ri joma te 900 yen vwẹ ọke vẹ ena rayen vwọ chọn avwanre uko vwo ru ọrhuẹrẹphiyotọ na. Ayen ghwọrọ inọke ri joma te 100,000 vwẹ owian na rọ reyọ ayen ẹgbukpe ivẹ. Ọnana ji churobọ si inọke 70,000 ra ghwọrọ vwo ru ividio ri Nehemaya: ‘Aghọghọ ri Jihova Ọyen Ogangan Wẹn,’ ro gron te ibrẹro 76.

 A ghwọrọ igho buebun vwọ vwẹrote iniọvo nana re vwomakpahotọ na, e yono ayen iruo na, je kẹ ayen asan vẹ ekuakua rẹ ayen guọnọre eje rere ayen se ruiruo na re.

 Jared Gossman ro nene Iniọvo ri Ruiruo rẹ Uhworo vẹ Ividio wian kuẹgbe da ta: “Umẹ Rọvwẹrote Eyono rẹ Ẹko Rọvwẹrote na guọnọre mamọ nẹ ẹkuruemu rẹ ẹkuotọ sansan vẹ ekogho sansan vwomaphia vwẹ ividio rẹ avwanre. Kidie nẹ avwanre iniọvo rẹ akpọeje, a je guọnọ nẹ ividio na nabọ dje ayen phia. E se vwo ru ọnana, ẹko rẹ ihwo 24 vwẹ ẹkuotọ sansan ri te 11 keyen kuomakugbe wian owian nana. Ọ guọnọ igho obuebun, egbemuo kugbe omamọ rẹ ọrhuẹrẹphiyotọ e ki se si uyovwin koko ruiruo rẹ akpọeje tiọna.”

 E se vwo ru buebun rẹ ividio rẹ avwanre, a cha guọnọ ekuakua vẹ asan re de se ru ifimu ro fo vwọ kẹ ayen. Kerẹ udje, a bọn asan re de ru ividio ri Nehemaya: ‘Aghọghọ ri Jihova Ọyen Ogangan Wẹn,’ vwevunrẹ istudio ri Mt. Ebo rọ kẹrẹ Patterson, New York, U.S.A. Iniọvo na sa vwọ vwẹ itetoro rẹ ukoko na vwo ruiruo vwẹ idjerhe ro shephiyọ ọke rẹ ayen de ru ifimu na, ji ruo họhọ ikuegbe ri Baibol rẹ ọke awanre, ayen da vwẹ erọnvwọn re pha phapharhe vwo ru igbẹhẹ na, ọ vwọ họhọ igbẹhẹ ri Jerusalẹm awanre. Irhe ra vwẹ ifomu phare ro gron te ichiyin 20 yen e vwo ru igbẹhẹ na, a da vwẹ ọda rharọ ọ vwọ họhọ ikuta. E se mu “igbẹhẹ” nana kpo ẹdia ọfa o vwo fo ẹbẹre sansan rẹ ifimu na, ọnana da nẹrhẹ uche rẹ erọnvwọn ra guọnọre vwẹ ifimu na kpotọ. Dedena, a je guọnọ igho rọ joma te $100,000 (U.S.) e se vwo ru erọnvwọn re che vwo ruiruo vwẹ eha rudje na. a

 Ọdavwaro avwanre kpahen ọghwẹkoko rẹ enukpe nana kọ rhoma ganphiyọ, rẹ avwanre rhe vwọ riẹn idjerhe e ruro wan. O mu avwanre ẹro nẹ e che jiri Jihova vwẹ akpọeje fikirẹ ẹgbaẹdavwọn re se vwo ru ọrhuẹrẹphiyotọ nana. Ovwan kobiruo vwọ kẹ itetoro ri ghwologhwolo rẹ ovwan ruẹ vwo biẹcha iruo rẹ akpọeje womarẹ donate.pr418.com vẹ ena efa.