Vidio dzine ra dzi ṱalela mabuthanoni ashu, dzi a ri kwama mbilu nahone dzi ri thusa uri ri pfesese khwine zwine zwa funzwa nga Bivhili. Kha Buthano ḽa Dzingu ḽa 2020 ḽi re na tshiṱoho tshine tsha ri “Dzulani No Takala”! hu na vidio dza 114. Hu dovha ha vha na nyambo dza 43 dzo ṋekedzwaho nga miraḓo ya Tshigwada tshi Langaho na vhathusi vhatsho. Naa no no vhuya na ḓivhudzisa uri hu itwa mushumo mungafhani na uri zwi ḓura vhugai u lugiselela dzenedzi vidio?

 Vhahashu vha ṱoḓaho u vha 900 u mona na shango ḽoṱhe, vho shumisa tshifhinga tshavho na vhutsila havho u itela u thusa kha wonoyu mushumo. Vho fhedza awara dzi ṱoḓaho u vha 100 000 vha khou ita wonoyu mushumo we wa fhedza miṅwaha mivhili. Zwenezwi zwi katela na awara dza 70 000 dze dza vha dzi tshi ṱoḓea u itela u fhedza ḽitambwa ḽa Bivhili ḽa mimunithi ya 76, ḽi re na tshiṱoho tshine tsha ri Nehemia: “Dakalo Ḽine Yehova A Ḽi Ṋea Ndi Maanḓa Aṋu.”

 Ho shumiswa tshelede nnzhi u itela u ṱhogomela vhenevha vhathu vhane vha shuma nga u ḓifunela, u vha ṋea zwishumiswa na fhethu ha u shumela uri vha kone u ita wonoyu mushumo.

 Vho-Jared Gossman vhane vha shuma kha Muhasho wa Dzividio na u Rekhoda, vho ri: “Komiti ya u Funza ya Tshigwada Tshi Langaho i ṱoḓa vhukuma uri kha vidio dzashu hu vhe na vhathu vha mvelele dzo fhambanaho na uri vidio dzi rekhodiwe fhethu ho fhambanaho. Ndi nga nṱhani ha uri ri vharathu na vhakomana u mona na shango ḽoṱhe nahone ri ṱoḓa vidio dzashu dzi tshi zwi sumbedza. U itela u swikelela tshenetshi tshipikwa, zwigwada zwa 24 zwi bvaho kha mashango a 11, zwo shuma zwoṱhe kha wonoyu mushumo. Ho vha hu tshi ṱoḓea tshelede nnzhi, u dzudzanya na u shumisana uri vhathu vha kone u shuma vhoṱhe u mona na shango ḽoṱhe.”

 Uri ri kone u ita vhunzhi ha vidio dzashu, hu dovha ha ṱoḓea zwishumiswa zwo khetheaho. Sa tsumbo, u itela u lugiselela ḽitambwa ḽine ḽa ri Nehemia: “Dakalo Ḽine Yehova A Ḽi Ṋea Ndi Maanḓa Aṋu,” ho fhaṱiwa fhethu he ḽa vha ḽi tshi ḓo tambelwa hone ngei Mt. Ebo studio tsini na Patterson, New York, U.S.A. U itela u shumisa zwavhuḓi miṋeelo ngeno hu tshi khou itwa uri ḽitambwa ḽi tshimbidzane na tshifhingani tsha kale, vhahashu vho ita mbondo nga zwipiḓa zwi sa lemeli dzine dza fana na mbondo dza muḓi wa Yerusalema wa tshifhingani tsha kale. Tshipiḓa tshiṅwe na tshiṅwe tsho vha tsho lapfa mithara dza rathi, tsho itwa nga thanda dzo kukumuwaho dzo penndiwaho uri dzi vhonale u nga ndi matombo. Dzenedzi mbondo dzi nga pfuluswa dza vhewa nga nḓila dzo fhambanaho musi hu tshi tambiwa zwipiḓa zwo fhambananaho. Zwenezwo zwo leludza zwithu uri hu si ṱoḓee zwithu zwinzhi-zwinzhi. Fhedzi ho vha hu tshi ṱoḓea tshelede i ṱoḓaho u vha R1 685 510.00 u itela u fhaṱa henefho fhethu hune ḽitambwa ḽa ḓo tambelwa hone. a

 U ḓivha zwo engedzeaho nga ha nḓila ye buthano ḽa uno ṅwaha ḽa lugiselelwa ngayo, zwi ita uri ri ḽi dzhiele nṱha nga ho engedzeaho. Ri fhulufhela uri zwoṱhe zwe zwa itwa uri ḽeneḽi buthano ḽi vhe hone, zwi ḓo rendisa Yehova u mona na shango ḽoṱhe. Ri livhuwa vhukuma u ṋeela ha vhoiwe zwi tshi bva mbiluni kha mushumo wa shango ḽoṱhe ni tshi shumisa donate.pr418.com na nga dziṅwe nḓila.