Iro video aby amy fivoriambeny vondroparitry aby io ten̈a manohin̈y fontsika mare. Iro io koa mampitombo fahatakarantsika raha ampianariny Baiboly. Karaha ataony tamy taon̈o ty, nisy 114 video naboaka tamy Fivoriambeny Vondroparitry “Miravoravoa Fo”! Nisy kabaro 43 koa nataondro Rahalahy an̈isany Filankevipitantan̈ana ndreky pan̈ampy iro, nizahantsika tamy video. Asa mba efa nidinihinao iro asa be natao nahavitan̈a izin̈y ndreky otrino vola lany tamizin̈y?

 Rahalahy ndreky ranabavy presky 900 erantany niasa mare ndreky nahatindry fotoan̈a ndreky nampiasa fahaizan̈andro tamizio. Nahadin̈y taon̈o aroe nan̈anovandro izin̈y, avio izikoa atambatra, efa tsy ela 100 000 lera lany nan̈anovan̈a izin̈y. Tan̈atiny 70 000 lera tamizio nan̈anovan̈a video “Nehemia: Haravoan̈a Baka amy Jehovah io Angovonaro.”

 Mety azonao antsain̈y donko fa ten̈a volabe nikarakaran̈a iro piasa antsitrapo maro mahafoe ten̈a aby io ndreky nivangan̈a zoty niasandro ndreky nikarakaran̈a tany niasandro.

 Karaha ty ho Jared Gossman, amy Sampanasa Momba Feo Ndreky Video: “Raha ten̈a tiany Komitiny Fampianaran̈a amy Filankevipitantan̈ana han̈aboaka kolontsain̈y ndreky tany isankarazany amy videontsika. Tiantsika haboaka amy video aby io fa atsika io fianakaviambe erantany. Ke nisy ekipy 24, amy firenena 11 niaraka niasa, baka nahavitan̈a iro video aby in̈y. Raha zen̈y nila fandaminan̈a tsialohaloha ndreky fiarahan̈a miasa, avio ten̈a nila vola be.”

 Naro tamindro video naboaka aby io koa nila fitaovan̈a spesialy. Ohatra izioty, tamy studio a Mt. Ebo marikitry Patterson, a Etazonỳ an̈y iro fitaovan̈a tamy video Nehemia: Haravoan̈a Baka amy Jehovah io Fiarovan̈a Anaro” in̈y. Iro rahalahy ndreky ranabavy aby io nan̈amboatra raha mira amy lakorony Jerosalema taloha tan̈y in̈y, baka karaha ten̈a izy raha io sady mba mitsitsy volany fan̈amezan̈a koa. Takelaka kakazo 6 metara maromaro natambatra, avio nisy raha karaha eponzy zay napetaka tamizio. Nipaindrendro amy zay raha io baka mba mira vato in̈y fahitavan̈a izy. Iro io mety nibatibatain̈y baka afaka nampiasain̈y tamy tany isankarazany, sady mba tsy mila man̈amboatra maro eky. Ndray izy man̈ano zen̈y, mbala nandany efa tsy ela 100 000 dolara amerikain (kadiriny 382 tapitrisa ariary) tamy zen̈y nan̈amboaran̈a fitaovan̈a aby nilain̈y tamy tantara in̈y fo. a

 Fahaizantsika raha jiaby zen̈y mahavy atsika man̈ody mankasitraka fivoriambeny vondroparitry amy taon̈o ty. Matoky atsika ho maro olo erantany hidera Jehovah, nohony ezaka natao tamy fivoriambe in̈y. Ankasitrahin̈y anaro tamy fan̈amezan̈a be ataonaro aminy asa erantany, na baka amy donate.pr418.com izio, na amy fomba hafa.