“Fa tagnate ty 19 taogne ty nandignisako ty raha toy!” Ino o raha nilignisa o mpiara-manompo amantikagne iohoeo? Ny Soratra Grika Kristianina—Fandikan-tenin’ny Tontolo Vaovao amy ty fireha’e, le ty firehake bengali. Maro ka ty nirehake mitovy amy izay naho fa naboake tamy ty fireha’e Ty Dikan-drehake Tontolo Vaovao. Fa nieretseretse vao rehe tie, ino iaby ty raha mila atao mba hahafahagne mandika naho mampiboake i Baiboly rey?

 Voaloha’e, manendre ekipa mpandika rehake heike ty Komity ty Fanoratagne amy ty Filan-keve-pitantanagne eo. Hatrake ombia ty ekipa ty mpandika rehake raike vaho izay mahavita mandika Baiboly? Hoe ty Nicholas Ahladis, miara-miasa amy ty Sampan’asa amy ty Fandikan-drehake a Warwick, a New York agne: “Maro ty raha mila dinehegne, agnisa izay ohatse tie fire ty mpandika rehake afake manao o tetik’asa iohoe, manao akore ty hasaro i firehake adikay, akore ty fahazoa o ndatio ty fiaignagne tamy ty andro ty Baiboly, sady miovaova arakarake i toeragney vao i firehakey. Naho ty Soratse Grike Kristiana avao zao, le tao’e raike hatrake amy ty telo taogne eo ho eo ty andika ty mpandika rehake ila’e aze. Efatse taogne ndra mihoatse izay reke naho i Baibolỳ iaby. Faie elaela noho izay ty mandika Baiboly amy ty baiko moagne.”

 Faie tsy tihoe mpandika rehake avao ty ilaegne naho fa mandika Baiboly. Misy ekipa rahalahy ndra rahavave boake amy ty fiaviagne sambe hafa ka ilaegne, misy fotoagne aza boake amy ty firenena sambe hafa, am-pirehafegne ty heve’e miomba i fandikan-drehakey. Tsy karamaegne iareo naho fa manao izay. Tena paliae i mpandika rehakey ty fagnamarehagne atao iareo, satria magnampe iareo handika Baiboly maregne soa, mazava sady mora azo o ndaty. Hoe ty rahalahy raike boake Afrika Atimo agne, mpampiofagne mpandika rehake amy ty fandikagne Baiboly toy: “Mahatsiaro ho managne andraikitse bey agnatreha i Jehovah eo naho amy ze mpamaky ty Saontsi’e o mpandika rehakeo.”

 Naho fa vita i fandikan-drehakey, le tsy maintsy atao pirinty naho atambatse hanjare boke i Baibolỳ. Faie mba hahavitagne izay, le misy raha folo fara fahatsiampe’e paliae iareo amy i fanoagne pirintỳ ao. Intoagne iaby zay: Taratasy, ranon-draha mainte, raha famboaragne fognom-boke, kole, plastike tsy len-drano, volafotsy nipisahegne, taly kede, feheloha, karazan-draha magnenjagne i taratasy hatao bokey, fitaovagne magnampe amy ty fanambaragne i Baibolỳ. Eo amy ty 20 tapetrisa dolara mahery ty niviliagne o fitaovagne fampiasaegne mba hampikambagnagne Baiboly rehoe tamy 2019. Niasa tagnate ty 300 000 lera mahery i rahalahy tamy i fanoagne pirintỳ tao rey, tamo o taogne iohoe avao, mba hamboaragne naho handefasagne Baiboly.

 Nagnino tika ro mandany fotoagne naho vola bey hoe izay? Hoe ty Joel Blue, amy ty Sampan-draharaha Fanoagne Pirinty Magneran-tane ao: “O Baibolio ro boke tena miambake aboantikagne. Ataontikagne manintogne naho mahafinaritse ty pozi’e mba hagnomey voninahitse i Jehovah, i Andrianagnahare ivavahantikagney naho i hafatse torientikagney.”

 Ankoatse i Dikan-drehake Tontolo Vaovao mahazatsey, le mamoake Dikan-drehake Tontolo Vaovao amy ty endre’e hafa hoahy ze tena mila izay tikagne. Agnisa izay ty Dikan-drehake Tontolo Vaovao amy ty soratse braille, sady fa misy amy ty firehake folo io tie amy izao. Maharetse valo lera ty famboaragne ty Baiboly raike amy ty soratse braille. Tsy maintsy zarazaraegne ho boke maromaro io, le mipay etazera mirefe 2,3 metatse eo ho eo fara fahakede’e mba hasiagne o boke rehoe. Mamboatse Baiboly manokagne hoahy ze migadra ka tikagne. Atao taratasy ty fogno ty Baiboly iareo satria izay avao ty ekegne hazilike am-pirizò agne.

 Magnova ty fiaigna ze ndaty mamaky aze ty Dikan-drehake Tontolo Vaovao. Dineho ohatse ty fiangonagne mirehake kiluba, amy ty tanàgne atao tihoe Tombe, amy ty Repoblika Demokratika i Congo agne. Agne amy ty 1 700 kilometatse mahery miala i rovay ty misy i Tombe. Baiboly raike avao ty mba nanagna ty Vavolombelo i Jehovah agne, ie amy izaò firehake kiluba fa ela ty agnate’e ao. I Baiboly raike ignehoe avao ty ifandimbeza ty rahalahy agne naho fa magnomagne ty anjara’e amo o fivoriagneo iareo. Faie nahazo Dikan-drehake Tontolo Vaovao amy ty firehake kiluba, ty ndaty tsikiraidraike amo o fiangonagne iohoe ao, nanomboke tamy Aogositra 2018. I Baibolỳ iaby ty niazo iareo sady vaovao ka i fandikan-drehakey.

 Hoe ty rahavave raike mirehake alemà, miomba i Baiboly Dikan-drehake Tontolo Vaovao nihavaozegney amy ty fireha’e: “Tsy mirehake sasa raho hinane zao tie, mila mamaky Baiboly raho. Izao ty rehafeko: ‘Ombiagne raho ro afake mamaky maromaro amy ty Baiboly toy?’” Nanoratse hoe izao ka ty gadra raike toy: “Nahazo Dikan-drehake Tontolo Vaovao raho sady tena nagnova ty fiaignako io. Tsy nisy azoko ndra raike ty raha rehafe i Baiboly talohay. Nanomboke ty namakiako ty dikan-drehake toy, le tena mazava soa amako ty raha rehafe’e. Te hahafantatse soa miomba ty Vavolombelo i Jehovah raho, sady teako ho hay tie akore ty hahavy ahy hanjare ho Vavolombelo i Jehovah.”

 Ze mpamaky i Dikan-drehake Tontolo Vaovaoy iaby, le tena mankasitrake ty fagnomezagne atao’areo mba hanohagnagne ty fagnamboaragne o Baiboly iohoe. Misy fomba maromaro azo anoagne i fagnomezagne hoahy ty asa magneran-tane rey, ty amy donate.pr418.com ao. Misaotse fa tena matarike nareo.