Kada bulan, ginapaabot gid naton ang makapalig-on nga mga programa kag mga video sa JW Broadcasting. Pero, madamo sa aton mga kauturan sa Africa ang indi katan-aw sini nga mga programa. Ngaa?

 Madamo nga lugar sa Africa ang wala sing Internet. Kon may ara gid man, masami nga puerte ini kahinay kag mahalmahal kaayo. Halimbawa, may isa ka manugtatap sang sirkito sa Madagascar nga nag-download sang isa ka programa sang JW Broadcasting sa isa ka Internet café. Ginsukot sia sing $16. Mas daku pa ini sa kita sang pila ka tawo didto sa isa ka semana. a

 Pero bisan pa amo sini ang ila sitwasyon, minilyon ka tawo sa Africa ang makatan-aw na sang JW Broadcasting bisan wala sila sing Internet. Paano?

 Sugod sang 2017, matan-aw na sang mga nagaistar sa sub-Saharan Africa ang JW Broadcasting paagi sa isa ka satellite-television channel. Libre ini nga naga-broadcast 24 ka oras kada adlaw, 7 ka adlaw kada semana, sa 16 ka lenguahe.

 Para mahimo ini, ginkontrata sang mga Saksi ni Jehova ang isa ka television broadcast service para magpasalida sini nga programa paagi sa satellite. Ini nga satellite makalab-ot sa 35 ka pungsod sa sub-Saharan Africa. Kada bulan, sobra $12,000 ang ginabayad sa sini nga kontrata. Kon kis-a, kon may mga okasyon nga kinahanglan i-broadcast sing live, nagabayad kita para sa isa pa ka channel. Bangod sini, linibo ka kauturan ang makatan-aw sang mga kombension ukon sang mga espesyal nga programa kon may branch visit.

 Madamo nga tawo, bisan ang indi mga Saksi, ang makatan-aw sang mga programa paagi sa JW satellite channel sa ila mismo TV sa ila balay. Pero may mga kauturan nga indi makasarang magbakal sang mga equipment nga kinahanglan para matan-aw ang mga programa sa satellite channel. Gani, sobra 3,670 ka Kingdom Hall ang ginbutangan sang satellite-receiving equipment para matan-aw sang mga kauturan ang JW Broadcasting. Kon may TV na ukon projector ang Kingdom Hall, mga $70 ang gasto para sa mga equipment, dala na dira ang delivery. Pero kon wala pa, ang gasto makalab-ot sa $530.

 Ginapasalamatan gid ini sang mga kauturan. Ang isa ka gulang sa Cameroon nagsiling: “Para sa amon pamilya, daw manna ini sa tunga sang desyerto.” Si Odebode, nga isa ka brother sa Nigeria, nagsiling: “Nagatan-aw kami sa sini nga channel tatlo ka beses kada semana. Eksayted gid pirme ang amon mga bata nga magtan-aw. Kon kis-a gani kon lain nga channel ang amon ginatan-aw gusto nila nga isaylo ini sa JW channel.” Si Rose, nga taga-Nigeria man, nagsiling: “Nagakawili ako tan-aw sang balita, gani nagapasalamat gid ako sa JW satellite channel kay bangod sini indi na puro balita lang ang akon ginatan-aw. Kay kon magtan-aw gani ako sang balita, nagainit ang ulo ko kag gina-highblood ako. Naumpawan gid ako kon magtan-aw ako sang JW Broadcasting kay nagarelaks ang akon pamatyag kag napalig-on ako. Amo na ini ang paborito ko nga channel. Pagpakamaayo gid ini halin kay Jehova.”

 Ang isa ka manugtatap sang sirkito sa Mozambique nagreport nga sa iya sirkito, ginbutangan sing mga equipment ang mga Kingdom Hall para matan-aw ang mga programa sa satellite channel. Mga isa ka oras antes sang miting nagaabot na ang mga kauturan para magtan-aw sang JW Broadcasting paagi sa satellite.

 Sang 2019 nga internasyonal nga kombension sa Johannesburg, South Africa, gingamit ang satellite channel para mapatan-aw ang pila ka pamulongpulong, pati na ang mga pamulongpulong sang isa ka miembro sang Nagadumala nga Hubon, sa siam pa ka lugar. Si Sphumelele, nga nagatrabaho sa Broadcasting Department sa branch sa South Africa, nagsiling: “Sang una, ginapatan-aw ang mga pamulongpulong paagi sa Internet. Nagakinahanglan ini sing maayo nga Internet connection kag tama ini kamahal. Pero ang JW satellite channel barato lang kag maayo ang connection.”

 Bangod sa inyo maalwan nga mga donasyon sa worldwide work, madamo nga kauturan sa Africa ang makatan-aw na sang JW Broadcasting paagi sa satellite. Nagapasalamat gid kami sa inyo mga donasyon paagi sa donate.pr418.com.