Ninting bulan, kitai sigi enda sabar nganti program ke deka dikeluarka ba Berita JW. Tang sayau, mayuh menyadi kitai ba Afrika enda ulih meda program tu nengah internet. Nama kebuah?

 Mayuh endur ba Afrika, enda entu bulih tauka nadai internet. Enti sema bisi, internet nya amat lubah lalu amat mar. Chunto iya, seiku tuai ti ngabas ba Madagascar, kala download program Berita JW ba siti endur ke baka cafe. Iya patut mayar dalam urung 16 dolar (tauka RM66.08). Ba sekeda orang, penyampau tu lebih ari ungkus ke dikena sida dalam seminggu. a

 Taja pan bisi penekul ke baka tu, bejuta iku orang ba Afrika agi ulih meda program Berita JW, tang enda begunaka internet. Baka ni?

 Kenyau ari taun 2017, Berita JW disediaka ngena satelit nengah TV, ngagai orang ke diau ba begian Selatan Sahara Afrika. Program tu dipandangka dalam 24 jam sehari, 7 hari seminggu, ba 16 bengkah bansa jaku.

 Ngambika program tu ulih dipandangka ngena satelit, Saksi Jehovah nyain kontrak enggau station TV. Satelit nya ulih nyapai dalam urung 35 iti menua ba begian Selatan Sahara Afrika. Enti sema bisi pengawa bukai ti begunaka satelit, kitai mega patut mayar lebih ngambika program nya ulih dipandangka. Enggau chara tu, beribu iku bala menyadi ulih meda program ke dipandangka terus nya.

 Mayuh orang, indah ke ukai Saksi, mega ulih meda program tu nengah satelit ba TV sida empu. Tang, mayuh menyadi kitai agi enda tebelika perengka kena meda utai ke dipandangka nengah satelit nya. Nya alai, lebih ari 3,670 iti Palan Gempuru ke disediaka enggau perengka ti chukup, ngambika sida bulih segenil satelit. Nya baru bala menyadi kitai ulih meda program Berita JW ba din. Rega semua perengka ke diguna nya, nyengkaum upah nganjung, kira-kira 70 dolar (tauka RM289.11). Nya pan enti sema Palan gempuru nya sigi udah bisi TV tauka projektor. Tang enti nadai, ungkus nya engka ulih manggai 530 dolar (tauka RM2,189.16).

 Bala menyadi amat beterima kasihka bantu tu. Seiku tuai gempuru ba Cameroon madah: “Tu sempama mana ba tengah-tengah menua puang ke kami sebilik.” Odebode, iya nya seiku menyadi lelaki ba Nigeria madahka: “Kami sebilik meda program tu tiga kali seminggu. Bala anak aku endang sigi udah nganti alai kami meda program tu. Indah, enti kami meda cherita bukai, sida minta kami nukar nya ke program Berita JW.” Rose, ke diau ba Nigeria mega madah: “Pengudah bisi satelit JW, aku berasai gaga amat, laban tu ulih ngurangka awak aku meda berita. Laban lebuh aku meda berita, aku jampat stres lalu darah aku niki. Tang meda Berita JW, ngeringka aku, lalu ati aku berasai lantang! Tu meh berita ke dikerinduka aku. Tu berekat ti berega ke datai ari Jehovah.”

 Seiku tuai ti ngabas ba Mozambique madahka riput, ba pelilih ke dipegai iya, Palan Gempuru sida udah bisi semua perengka ke diguna ngambi senang bulih segenil satelit. Nyadi, suah iya bala menyadi tumu sejam tauka lebih sebedau gempuru berengkah, ngambika meda Berita JW dulu.

 Maya konvensyen entarabansa ba Johannesburg, kena taun 2019 di Afrika Selatan, beberapa iti cheramah, nyengkaum cheramah ke dikenataika Raban ti Ngiring, dipandangka ngagai semilan iti endur ngena chara satelit. Sphumelele, ari Begian Berita JW ba menua nya, iya nya ba pampang opis Afrika Selatan madah: “Sebedau tu, cheramah nya dipandangka nengah internet. Tang ungkus nya amat mar, lalu segenil internet enda manah. Tang satelit JW jauh murah agi, lalu segenil iya pan manah.”

 Ketegal pengerah jari bala menyadi meri duit pemeri ba serata dunya, mayuh menyadi kitai ba Afrika Selatan ulih meda program Berita JW ngena chara satelit. Kami amat beterima kasihka pemeri kita enggau mayuh macham chara, ti bisi disediaka ba donate.pr418.com.