Caran quilla cushihua chapanchi JW Broadcasting nishca animachij programagunara, videogunaras ricungaj. Shinajpi, África llactamanda ashca huauqui paniuna cai programagunara Internetpi mana ricuna ushanun.

 Ashca África partiunai Internet mana charinun. Huaquimbi Internet charishas mana dsaslla apin, maicambi yapa valin. Por ejemplo, Madagascar llactai shu superintendente de circuito huauqui, shu Internet puistuma rica JW Broadcasting quillamanda llucshijta programara llucchingahua. Chibi 16 dólares cubranuca, ¡cai anmi shu semanai tarbashcara yali pagashca! a

 Cai tunu turmindusgunara charishas, huaranga runauna África llactai cuna Internet mana charishcallaira JW Broadcasting ricuna ushanun. ¿Imasnara ricuna ushanun?

 2017 huatamanda África subsahariana partii causajcuna, JW Broadcasting ricuna ushanun shu canal satelital televisiombi. Cai canalda ricuchingaj mana cullquira cubranun, intiru punzha, canzhis punzhauna semanai, 16 shimiunai ricuchishca an.

 Caita rurangahua, Jehovahuaj testigoguna paganun shu radio difusión televisión nishcara, chita rurasha satelitemanda tucui programagunara ricuchina ushanun. África subsaharianamanda 35 llactauna cai satélite utilizanun. Cai satélite utilizangahua caran quillai 12.000 dolarguna yali paganun. Astaumbas shu programa chi ratullaira ricuchina munasha shuj canalbi ricungaj mas cullquira pagana anun. Cai, ashca huaranga runaunara yanapan cushihua ricungaj asambleagunara, sumaj programagunaras central mundialmanda shu huauqui pasiashcai.

 Ashca runauna, mana Jehovahuaj testigoguna ashas JW satelital nishca canalda televisiombi ricunun paiguna huasii. Shinajpi, ashca ñucanchi huauqui paniuna mana randina ushanun cai ministishca aparatogunara satelital nishca canalda ricungaj. Yanapangahua 3.670 Reinomanda Yachana Huasiuna satelitemanda señalda apingaj aparatogunara apinushca. Chita apisha huauqui paniuna ricuna ushanun cai programa JW Broadcasting. Reinomanda Yachana Huasii shu televisión, shu proyector charisha cai equipo cungahua ñaca 70 dolarguna valin. Manasha cai aparatoguna valina ushanun ñaca 530 dolarguna.

 Ñucanchi huauqui paniuna ashcara pagarachushca sintirinun cai canalmanda. Shu tandarijcunara cuiraj huauqui Camerunmanda nin: “Cai, ñucanchi aillu shu chaquishca pambai maná tanda nishca cuinta an”. Nigeria llactai shu huauqui Odebode nica: “Cai canalbi ñuca ailluhua quinsa cuti semanai ricunchi. Ñuca quinsa churiuna cushihua chapanun cai programa ricungahua. Maican timpuunai mañanun cai JW canalma turcangaj”. Shinallara Rose shuti pani nin: “Cuintashcamanda canalda tucui timpui ricuj acani, shinajpi cuna chi canalda ricuna randimanda cai JW satelital nishca canalda ricuni. Shuj rimashcaunara uyaushcai yapa uctalla piñarij acani, yapa turbarishca sintirina ahualla aca. Shinajpis cuna cushihua rimani JW Broadcasting ricuna shu tunu an ¡ñucara ali sintichin! Cai canal ñuca munashca an. Cai shu atun Jehovamanda bendición an”.

 Mozambique llactai shu superintendente de circuito huauqui nin pai pasiangaj circuitoi Reinomanda Yachana Huasiuna satélite señalda apisha JW canalda ricungaj aparatogunahua rurashca anun. Chi congregacionmanda huauquiuna tandarinara callaringaj shu hora ñaupa pactanun satelimanda JW Broadcasting programara ricungaj.

 Sudáfrica Johannesburgo llactai, 2019 huatamanda asamblea internacionalbi chi canalda utilizanuca shu iscun lugargunai shu huauqui Cuerpo Gobernantemanda sumaj yachachishcara uyanauna charingaj. Sudafricamanda sucursalbi Departamento Local de Broadcasting sirvij huauqui Sphumelele nin: “Ñaupa huras Intermanda cai yachachishcara uyana ricuchina acanchi. Shinajpi chita rurangaj ministij acanchi ali Internet charina, datos nishcaunaras pagana. JW satelital canalda charingaj mas ahualla, mas ali aca”.

 Intiru mundui Bibliamanda yachachingaj canguna cuyashca cullquihua, ashca huauqui paniuna África llactai satelitemanda JW Broadcasting programagunara ricuna ushanun. Cangunara ashcara pagarachunchi Internetpi donate.pr418.com puistui shungumanda cullquira cushcaraigu.