E vica vata na drau na milioni era tiko ena yasayasa vakaLatina mai Merika. Dua na iwiliwili levu e tiko ga na nodra vosa kei na nodra itovo vakavanua. Era okati kina na tacida, era dau mareqeta na vanua era cavutu mai kina. Me rawa nira vukei vakayalo, e vakadewataki qai veisoliyaki na noda ivola ena sivia na 130 na vosa vakaLatina. a Ia eso vei ira na tacida era se tusaqati tiko ga nira yalodina vei Jiova, ya nira sega ni muria na itovo vakavanua e veisaqasaqa kei na iVolatabu. E yaga vakacava vei ira na nomu cau?

 Eso na tacida era tiko ena koro o Huichol ena veidelana e Jalisco State, mai Mexico. Era vakaraitaka ena veidokai nira na sega ni vakaitavi ena veika vakalotu ni beci kina na nodra lewaeloma. b Qori e vakacudrui ira eso na lewenikoro. Ena ika4 ni Tiseba 2017, era mokulaki ira na mataveitacini kei ira eso tale. Era mani vakasavi mai na koro, e vakacacani na ka era taukena, qai vakarerei mera kua ni lesu ina koro.

 Era qai mai vukei ira na tacida qori na mataveitacini ena dua tauni voleka. Ia era na vukei vakacava mera lesu i nodra vale? E kaya e dua na tacida tagane o Agustín: “Keimami sega ni sauma rawa e dua na loya, keimami sega tale ga ni kila o cei me vakasalataki keimami ena ka vakalawa.”

 Me vaka ni sa beci na nodra dodonu ni sokalou na tacida, e veivuke totolo sara na valenivolavola ni tabana e Merika e Loma. Ena sala cava? Kena imatai, era kerei ira na vakailesilesi mera vaqaqa na ka e caka vei ira na tacida. Oti e vakadonuya na Komiti ni Kodineita ni iLawalawa Dauvakatulewa meratou cakacaka vata kei na Tabana ni Lawa ena itikotiko liu, me ratou veilewaitaka tale ga na ka e caka vei ira na tacida mai Huichol. E kau sara na kisi ina mataveilewai cecere e Mexico.

 Era vakaitavi kina eso na loya mai veiyasa i vuravura ra qai vakamacalataka ni dodonu me dokai na itovo vakavanua e kilai kina e dua na koro. Ia e dodonu tale ga me taqomaka na koro na nodra dodonu o ira kece na lewenikoro. E tu kece na noda dodonu yadua se mani vanua cava eda tiko kina.

 Ena ika8 ni Julai 2020, e duavata na Mataveilewai Cecere kei keda na iVakadinadina i Jiova. E vakarota mera lesu kece ina koro na tacida era cemuri mai. E kaya o Agustín, sa cavuti oti mai: “Keimami vakavinavinakataka na nodra veivuke na tacida. E rawati na ka kece qo ena nodra veivuke.”

 Era sotava tale ga qori na tacida ena koro o San Juan de Ilumán mai Ecuador. Era tiko i keri e levu na taukei ni vanua mai Otavalo Valley. Ena 2014, era tekivu tara e dua na Vale ni Soqoni. Ia e liutaka mai e dua na italatala e dua na ilala levu, sivia na 100, mera tarova na nodra tarataravaki na tacida. E tarova tale ga na koro na nodra soqoni vata na tacida.

 Rau cakacaka vata na tabana ni lawa ena valenivolavola ni tabana mai Ecuador kei na itikotiko liu me vukea na ivavakoso me taqomaki nodra dodonu ni sokalou. Era mani kauta na tacida na kisi qori ina mataveilewai. Era tinia kina na dauveitusaqati na nodra veivakacacani, era tekivu soqoni tale na tacida, qai vakaoti na tara ni Vale ni Soqoni. Ia me rawa ni taqomaki tiko ga na nodra dodonu na tacida, e kerei na mataveilewai cecere me vakataulewa ena dua na ka bibi: Ena vinakati me dokai tale ga na dodonu ni lewenivanua ena koro?

 Ena ika6 ni Julai 2020, e qai rogoca na kisi qori na mataveilewai cecere e Ecuador. Era mani matataka na ivavakoso eso na tacida era loya e Ecuador. Ratou vosa tale ga ina mataveilewai e va na tacida loya, ratou dau qarava tale ga na kisi ni veilewai va qo. Ia ena vuku ni vakatatabu ni COVID-19, ratou vosa ina mataveilewai ni ratou sema ina internet (videoconference). Qo se qai matai ni gauna me vakadonuya e dua na mataveilewai mera cakava qori na loya ni iVakadinadina i Jiova. c Ratou vakamacalataka na tacida loya eso tale na macala ni veilewai, e laurai kina ni se tiko ga na noda dodonu ni lewenivanua ke da lewe mada ga ni dua na koro.

 Era sa waraka tiko na tacida e Otavalo Valley na macala ni veilewai. Ia ena gauna mada ga qo, era vakavinavinakataka vakalevu na nodra veitokoni na mataveitacini. E kaya o César, e dua na qase ni ivavakoso e Ilumán Quichua: “O Jiova ga kei na nona isoqosoqo ena rawa ni kauaitaki keimami va qo. Dua dina na veivuke levu vei ira na le lailai.”

 Ratou iVakadinadina i Jiova kece na loya, ratou tu vakarau ni veivuke ena veilewai qai sega ni saumi. Ia na kena kau cake na kisi ina mataveilewai kei kena vakarautaki e taura e levu na gauna qai vakayagataki kina na ilavo. Ratou vakayagataka e sivia e 380 na aua me vakarautaki na ka me ratou na tukuna ena veilewai i Mexico, qai 240 na aua na kena vakadewataki na veika vakaivola. Vakacava na kisi e Ecuador? E voleka ni 40 na loya mai veiyasai vuravura era vakayagataka e vicavata na drau na aua ena vakarautaki ni kisi. E saumi vakacava na veika vakailavo e vinakati ena kisi ni veilewai qo? E rawa ga qori ni oni muria na iwalewale kece ni cau e vakamacalataki ena donate.pr418.com. Vinaka vakalevu na nomuni lomasavu.