Ti Latinoamérica u kʼwajíl yántolom i atiklábchik ani yanchik u kʼwajíl al i tsakam kwénchal jayej píl in káwintal ani jantʼiniʼ tin kʼakʼnál a Dios. Ani yan kʼal i epchal u kʼwajíl tanáʼ. Abal an atiklábchik kin exlaʼ tin kwéntaj an Biblia, an ólchixchik kʼal a Jehová in wilkʼámal i publicaciones al watʼadh 130 i kawintaláb. a Pero yan i epchal axi u kʼwajíl al axéʼchik xi kwénchal in tametnámal yan i kʼibataláb kom in exobnál an Biblia. ¿Jantʼiniʼ tu eyendháb an donaciones abal ka tólmiyatchik?

 An epchalchik in tákuy yabáts kin tʼajaʼ jawaʼ ujnámtej ka tʼajan al nixéʼ xi kwénchal. b Axéʼ in tʼajaʼ abal an atiklábchik ka lej tsákuy. Jaxtám ti 4 a diciembre ti 2017 jun i mukeʼ i atiklábchik in otsánchij in kʼimaʼ an ólchixchik kʼal a Jehová. Axéʼchik xi atikláb in kedhmay an epchalchik in ódhnanchij in kʼimaʼ ani in uchaʼchik abal yabáts ka wichiy max íj neʼetsak ka tsemdhájchik.

 Lej tólmiyatchik kʼal an epchal axi u kʼwajíl tanáʼ utat. Ani, ¿jantʼoj in éjtowalakchik kin tʼajaʼ abal ka wichiy tin tsabálil? Jun i epchal axi in bij Agustín, tu tʼilchal: «Yab i kwaʼalak i tumín abal ki aliy ani ki jálbiy jitaʼ tu ku tólmiy, jayej yab i exlálak juʼtáj ki aliy an tolmixtaláb».

 Kom an epchalchik kʼwájatak ti odhnáb ani u kʼanchinál kin kʼakʼnaʼ a Jehová, jaxtám an epchalchik axi ban sucursal ti la sucursal de Centroamérica dhubatkʼij in tsálpay jantʼiniʼ ti kin tólmiy. Okʼox in uchaʼchik an éyal abal kin tʼajaʼ ti kwéntaj jaleʼ ti kʼwajat ti odhnáb an epchalchik. Talbél, an epchalchik axi u tólmix kʼal an Kwenél i Ókʼnom, in uchaʼ an epchalchik axi ban Departamento de Asuntos Legales abal kin tólmiychik an epchal axi u kaw huichol. Talbél tʼajan abal an eyalchik axi más púlik ti México kin exlaʼ axéʼ xi kʼibataláb.

 Jun i mukeʼ i abogados axi in tólmiyal an ólchixchik kʼal a Jehová axi tin puwél an tsabál in bínaʼ jun i tʼilomtaláb juʼtáj tin uluw, abal antsanáʼ jantʼiniʼ jun i atikláb in kwaʼal in uchbíl ka kʼakʼnanchat jawaʼ in belál, axéʼ xi kwénchal. Jayej kwaʼal ki kʼakʼnanchij jawaʼ in belál axi kʼwajíl tanáʼ. An atiklábchik in kwaʼal in uchbíl ka kʼakʼnanchat jawaʼ in belál, juʼtámakits ka kʼwajiy.

 Ti 8 a julio ti 2020, an Suprema Corte de Justicia, in bínaʼ an olchixtaláb abal patal an ólchixchik kʼal a Jehová axi kedhmeyámej tin kwenchálil ka jilan ka wichiy. A Agustín in ulal jawaʼ in tsálpayalchik an epchal: «I lej kʼakʼnál patal jawaʼ an epchalchik in tʼajámal abal tu ku tólmiy. Yab u tsálpanchal jantʼey i watʼamálak max yabak u tolmiyámej».

 Ti Ecuador, an epchalchik axi u kʼwajíl ti San Juan de Ilumán, jun i kwénchal axi ti Otavalo, jayej in watʼaʼchik jun i odhnaxtaláb. Ti támub 2014, pidhan an permiso abal ka tújey kin tsʼejkaʼ jun i Atáj Tamkuntaláb. Pero jun i sacerdote in támkuy jun i 100 i atiklábchik abal kin kubaʼ nixéʼ xi tʼojláb. Jayej uchanchik an epchal abal yabáts ka tamkun.

 An epchalchik axi ban departamentos de Asuntos Legales axi ban sucursal ti Ecuador ani an central mundial, in tólmiy an epchalchik al axéʼ xi kʼibataláb. An epchalchik in neʼdhaʼ axéʼ xi kʼibataláb kʼal an tribunales axéʼ lej tolmíxin kom in jilaʼ abal an epchalchik ka tamkun ani kin talabédhaʼ an Atáj Tamkuntaláb. Abal talbél an epchalchik yab kin koʼoy i kʼibataláb abal kin kʼakʼnaʼ a Dios. An epchalchik axi pel i abogados in konchij an tribunales superiores, abal kin lej tʼajaʼ ti kwéntaj axéʼ xi konowixtaláb: ¿in kwaʼal in uchbíl jun i atikláb axi u kʼwajíl al jun i kwénchal ka kʼakʼnanchat jawaʼ in belál?

 Ti 16 a julio ti 2020, la Corte Constitucional axi ti Ecuador an éyal axi in kwaʼal más in tsap al nixéʼ xi bichow, in tʼajaʼ ti kwéntaj nixéʼ xi kʼibataláb. An abogados axi in tólmiy an epchalchik axi ti Ecuador, jayej pel i ólchixchik kʼal a Jehová. Jayej, kʼwajiy tseʼ i abogados axi pel i ólchix kʼal a Jehová, jajáʼchik in pidhál i tolmixtaláb an epchalchik axi in kwaʼal jun i kʼibataláb tin puwél an tsabál. Ani kom tújey an corona virus, axéʼchik xi abogados koʼoy ka tamkun por videoconferencia. I lej jikʼpaʼ kom an tribunal in jilaʼ abal an abogados in kʼál an ólchixchik kʼal a Jehová jayej ka kʼwajiy tanáʼ, por videoconferencia. c An epchalchik axi pel i abogados, in uchaʼ an eyalchik abal jun i atikláb bélits abal u kʼwajíl al jun i kwénchal, in kwaʼal in uchbíl kin tákuy jantʼoj in léʼ kin tʼajaʼ ani jantʼoj in léʼ kin kʼakʼnáʼ.

 An epchalchik axi ti Otavalo, kʼwajat in áychal jantʼoj tam takuxtaláb kin tʼajaʼ an eyalchik ani kʼwajatchik lej kulbél kʼal an takuxtaláb axi pidhan. A César, jun i ókʼnom axi ban tamkuntaláb Ilumán Quichua, in ulal: «A Jehová in eyendhál in bichówil abal kin tólmiy in tʼojnálilchik».

 Patal an abogados axi in tólmiy an epchalchik, jayej pel i ólchix kʼal a Jehová ani in tólmixinchik kʼal i kulbetaláb. Abal kin tólmiychik an epchal ani kin neʼdhaʼ al jun i tribunal, in yéjenchij i kʼij ani i tumín. An epchalchik ani an abogados in éyendhaʼ 380 horas abal kin tʼojojoy ani kin tólmiy an epchalchik axi ti México ani 240 horas abal kin wilkʼaʼ an úw axi neʼetsak kin éyendhaʼchik. Tin puwél an tsabál watʼadh 40 i abogados tʼójonchik abal kin tólmiy an epchalchik axi ti Ecuador. ¿Juʼtáj ti kaldhál an tumín abal kin tólmiy patal axéʼchik xi epchal? I ejtowámal ki tʼajaʼ kʼakʼnámal kʼal patal an donaciones axi tatáʼchik a binámal ti donate.pr418.com. Kʼakʼnámal kʼal patal an tolmixtaláb axi a binámalchik.