Vatu vavavulu vatwama mulifuchi lyaLatin America veji kuhanjikanga malimi avo nakukavangiza visemwa vyavo. Havatu kana hatwama navandumbwetu vavavulu vaze vamona visemwa vyavo kupwa vyavilemu. Hakusaka kukafwa vatu valinangule muchano wamuMbimbiliya, veji kwalumunanga nakupangila mikanda yaVinjiho jaYehova, mumalimi akuzomboka 130 aze veji kuhanjikanga chikuma mulifuchi lyaLatin America. a Chipwe ngocho, vandumbwetu vamwe vanamononga ukalu wakuvafumbukila mwomwo yakuzachila Yehova nakuhona kwazana muvisemwa vize vyalimbalaka najindongi jamuMbimbiliya vize veji kulinganga chikuma mungalila yavo. Uno mawana enu vanawazachisanga ngachilihi hakukafwa vandumbwetu kana?

 Vandumbwetu vamuMexico vaze vatwama mungalila yajipili yaHuichol muJalisco vakanyine kwazana muvilika vyamukwitava vize vyalimbalaka najindongi jamuMbimbiliya. b Oloze echi chevwishile kupihya vatu vamwe vamungalila yavo. Kaha kuheta ha 4 December, 2017, Vinjiho jaYehova navatu vaze valikachilenga navo vavalukukile kulizavu lyavatu vamungalila kana. Lizavu kana lyavahangile mungalila, nakwenyeka vikumba vyavo, nakuvevwisa woma ngwavo, weshowo mwakinduluka mungalila kana navamujiha.

 Kaha Vinjiho vamujimbaka jalihata nangalila kana, valisuwile kukafwa vandumbwetu hakuvahana vyuma vapwile nakusakiwa. Uno vahashile ngachilihi kukinduluka mungalila yavo? Ndumbwetu Agustín ambile ngwenyi, “Katwapwile najimbongo jakukumuna lihakoko, kaha nawa katwatachikijile kwakuhulisa mangana vatukafwe hachihande chetuko.”

 Hakuwana nge ava vandumbwetu vavakanyishile kulemesa Kalunga, ngocho mutango waCentral America wanguhwishile kuvakafwa. Chatete, mutango walwezele vilolo jafulumende vamuJalisco vakekese chihande kana. Kufumaho Komiti yaKuwanyisa yaLizavu lyaKutwaminyina lyaVinjiho jaYehova yavetavishile vazachile hamwe naLipatimende Lyatala haJishimbi lyahachikota chetu mangana vatale hachihande chavandumbwetu vamuHuichol. Echi chihande vachitwalile kuZango Yakulitulaho Yakusopa Milonga yamuMexico.

 Mahako vajishimbi vaze vafumine kumafuchi akulisezaseza vahanyine unjiho uze wasolwele ngwawo, vatu vakumembo vatela kuvumbika lisesa lyavakwavo nakuhona kuvayanjisa nganomu vatu vakujingalila jeka veji kuvavumbikanga. Vatu vosena vatwama nalisesa lyakulinga vyuma vimwe chamokomoko nokwo vatwama.

 Kuheta ha 8 July, 2020, Zango Yakulitulaho Yakusopa Milonga yasambishile Vinjiho jaYehova. Shikaho vambile ngwavo, vatu vosena vaze vahangile vatelele kukinduluka mungalila yavo. Agustín navakwavo vahanjikile ngwavo: “Tunasakwilila chikuma vandumbwetu havyuma vanatulingila, nge kavatukafwangako kachi katwahashile kukumisa ukalu kanako.”

 Vandumbwetu vaze vatwama muSan Juan de Ilumán muEcuador, muze mwatwama vatu vavavulu vamuChinema chaOtavalo navakiko vavafumbukilile. Kuheta mu 2014, ava vandumbwetu vaputukile kutunga Zuvo yaWangana hanyima yakutambula lisesa kufulumende. Chaluvinda kapilishitu wamuchachi yimwe akambile lizavu lyavatu vakuzomboka 100 mangana vayenga nakulukuka vandumbwetu nakuvakanyisa kutunga. Kaha vatu vamungalila kana, vakanyishile Vinjiho jaYehova kulikungulwila hamwe nakulemesa Kalunga.

 Vandumbwetu vamulipatimende lyatala hajishimbi lyahamutango waEcuador vazachilile hamwe nalipatimende lyatala hajishimbi lyahachikota chetu mangana vakafwe ava vandumbwetu vapwenga cheka nalisesa lyakulemesa Kalunga. Ngocho vatwalile echi chihande kuzango yakusopa milonga. Echi chalingishile vatu vamungalila kana valitwamine kufumbukila vandumbwetu, nakuvetavisa kulikungulwila hamwe, nakutwalaho kutunga Zuvo yaWangana. Vandumbwetu vapwile nakutala hachihande kana vahulishile jizango jakusopela jajinene jivalweze numba nge vatu vakumembo vatela kuvumbika lisesa vatwama nalyo vatu mukaye kosena nyi chiku.

 Kuheta ha 16 July, 2020, Zango yaKutunga Jishimbi yamuEcuador yaputukile kusopa chihande kana. Vandumbwetu vamuEcuador vaze vapwa mahako vajishimbi vemanyinyineko chikungulwilo hakusopa chihande kana. Kaha vandumbwetu vawana vakumafuchi akulisezaseza vaze vapwa mahako vajishimbi vakulindunuka vakiko vaputukile kuhanjika navaka-zango. Ava mahako vahanjikilile kumafuchi akulisezaseza kuzachisa makina mwomwo yakukavangiza jindongi jamwakulikingila kumusongo waCOVID-19. Elu lukiko lwapwile lwola lwatete zango yakusopa milonga kwitavisa mahako vaze veji kwimanyinangako Vinjiho jaYehova vamukaye kosena, vasope navo chihande mujila kana. c Mahako jaVinjiho jaYehova vahanyine unjiho vilolo jafulumende vaze vatala hajishimbi wakusolola nge navatu vaze vatwama kuvihela vyakumembo vatela kuvumbika lisesa vatwama nalyo vatu.

 Vandumbwetu vamuChinema chaOtavalo vali nakuvandamina omwo Zango yaKutunga Jishimbi nayivatwilamo chihande chavo. Chipwe ngocho, oholyapwa vanasakwilila chikuma hakuvakafwa kuli vandumbwavo. César uze apwa mukulwane muchikungulwilo chaIlumán Quichua ambile ngwenyi: “Yehova ikiye kaha nahase kulingila vatu vavandende vyuma vyavinene ngana kuhichila muliuka lyenyi.”

 Mahako vosena vaze vali nakutala hachihande kanechi vapwa Vinjiho jaYehova. Kaha vanawahilila chikuma kukafwa vandumbwavo hawana wakanyombo. Chipwe ngocho, kukekesa unjiho wachihande kana nakuchisopa kuzango, chambachile lwola najimbongo. Vambachile jiola jakuzomboka 380 hakusoneka mijimbu yakutalisa kuchihande kana najiola 240 hakwalumuna mijimbu kana mulilimi vazachisa chikuma mufulumende yaMexico. Mahako kafwe 40 vakumafuchi akulisezaseza vazachishile jiola jajivulu chikuma hakutala hali echi chihande chavandumbwetu vamuEcuador. Uno jimbongo tunazachisanga hakukafwa vandumbwetu kana jinafumunga kulihi? Jinafumunga kuwana wajimbongo mweji kuhananga kuzachisa jijila jakulisezaseza jize jatwama ha donate.pr418.com. Tuli nakumisakwilila chikuma hamuchima wenu wakuhana.