Pa mintapendwa ya wantu wano wakakwikala ku Latin America, pawa na wano wawa ni ntambi zyawo swinya wano wakalanda ivitundu vyawo. Awavule pe wa-a awanawitu na wankazi wano wacindika intambi zya kumwawo. Pa kuti wavwe awantu ukusambilila icine ca mu Baibolo, wakapiliwula nu kusalanganya amabuku ya nte zya kwe Yehova nu kusalanganya mu vitundu vino vyawela ukutali ukucila pe 130 mu Latin America. a Nanti ciwe wo-o, awanawitu wamwi wakasunkanya intazi, pamulandu vye wakuwa Inte zya kwe Yehova, na pamulandu wakukana ukucitako intambi zino zyavula kuno wikalila, zino zisikwivwana na vino Baibolo yikalanda. Uzye wakawomvya wuli imisangulo yinu kukuwavwa?

 Awanawitu na wankazi ku Mexico, wano wakakwikala mu kaya ka Huichol kano kawela mu myamba ya Jalisco wakanile ukuti wayisanzye mu ntambi zino zyapusine na vino Baibolo yikalanda. b Co-o calenzile ukuti wamwi mukaya wafulwe. Pa 4 December, 2017, iwumba lyawantu lyinjilizile wa Nte na wonsinye wano walinji nawo, swinya wawawinzile mukaya. Wawononezile ivintu vyawo nu kuwanena ukuti wensinye wino wanyoka mukaya walinji nu kumukoma.

 Wa Nte wano walinji mupipi na kuno awanawitu wasamalizile watalemile na kwi sote wawavwilizizye mwe vino vyalondekwanga. Nomba avyani vino vyazizipizile ukucitwa pa kuti wanyocele ku mwawo? Umwanawitu Agustín walanzile ukuti “Tutalinji ni ndalama imvule zino tunginjizizya e loya uwakutulandilako, swinya tutamanyile na wino tungakolowozya pakuti atupandeko amano pa vyamilandu.”

 Wo-o vino awanawitu watalinji ni nsambu zya kupepa, awa ku musambo wa Central America watasumvile ni mpindi ukucitapo cimwi. Icakutalicila wakolowozizye awa mu wuteko ukuti wavwambilizye pe wo-o umulandu. Cinji acakuti wawazumilizizye kwe Komiti ya kwa Kampanya iyi Wumba Lino Likatungulula ilya nte zya kwe Yehova ukuti wawombele ponga ne Legal Department iya ku maofesi makulu pakuti wapoke e saimoni yakulandilako awanawitu na wankazi. Wo-o umulandu wizile awufika na ku cilye icikulu ica mu musumba wa Mexico.

 Wa loya nanti awakulandilako umulandu wapekinye ivipepala muno walondolozile ukuti ndi wulyanye vino wanji wakacindika intambi zya wikala nsi, avino awikala nsi na wonye wazipizile ukucindika nu kucinjilila uwuntungwa wa wantu wawo. Awantu wansinye wawa ni nsambu asamulandu na kuno wakakwikalila.

 Mu July 8, 2020, icilye cizile acizumilizyako Inte zya kwe Yehova vino zyalanzile. Cizile acipingulapo ukuti wonsinye wano wawawinzile wazipizile ukunyocela kumwawo. Umwanawitu gustín, wino tulanzilepo kali walanda vino weliwe na wanawitu wanji wakasalifya pe vino wakayivwa. Watili: “Tukasalifya nkaninye swinya twawa ni nsansa pe vino awanawitu watucitila. Akusowa ukwavwa kwawo, nge pasi cino twacisile.”

 Awanawitu awa ku San Juan de Ilumán, akaya kano kawela mu Ecuador, kuno kukakwikalila awavule wano wakalanda ici Otavalo Valley. Mu 2014, pano wawazumilizizye, watalisile ukuzenga Ing’anda ya wufumu. Lelo nanti ciwe wo-o e simapepo watumile iwumba lya wantu ukucila pe 100 ukuya mukulesya awanawitu ukuzenga Ing’anda ya wufumu. Ne awamukaya walesizye Inte zya kwe Yehova ukuwungana ponga mukupepa.

 E legal departments iya ku musambo wa Ecuador, na ku Maofesi Makulu wawombezile ponga pakuti wacinjilile insambu zya kupepa zino awanawitu wawa nazyo. Awanawitu watwazile umulandu ku cilye. Co-o calenzile wa-a awantu ukuleka vino wacisile ku wanawitu nu kuwazumilizya ukuti watwalilile ukuzenga Ing’anda ya wufumu nukuwasunkana ponga mukupepa. Nomba pa kucinjilila insambu zye wa-a awanawitu, wano wakatwimilililako wanenile icilye cikulu ukuti cipingulepo pi wuzyo limwi ilicindame nkaninye ilyakuti: Uzye awikala nsi wazipizile ukucindika insambu zya wantu wonsinye?

 Pa 16 July, 2020, icilye cikulu ica ku Ecuador, civwile wo-o umulandu wa wanawitu. Awanawitu wa loya mu Ecuador walandizileko iwungwe. Cinji acakuti awanawitu 4 wano wamanya nkaninye wu loya, walanzile ni cilye. Pa mulandu we Kolona, walandangavye ukuwomvya ama vidyo. Pasi icilye cino cikatela acizumilizya awa mwe legal Dipartimenti wano wakakwimililako Inte zya kwe Yehova insi yonsinye ukulandapo pa mulandu mwe yo-o inzila. Wonye awuno walinji amuku wakutalicila. c Awanawitu awa mwe we-e Dipartimenti walanzile pa cilye ukuti cizumilizye ukuti awantu watazipizile ukutiticizya insambu zya wikala nsi pamulandu vye wakuti awikala nsi.

 Awanawitu awa ku Otavalo Valley wakalindililavye pe vino icilye cilipingulapo. Pe yo-o impindi wakasalifyavye pa kwavwa kuno wapocelela. E César, e eluda mwi wungwe lya Ilumán Quichua watili: “E Yehova mutupunye awino angacita ivivule kwe watici ukupitila mwi wungwe lyakwe.”

 Waloya wonsinye wano wawombezile pe wo-o umulandu Ante zya kwe Yehova swinya wawa ni nsansa nkaninye ukuwomvya vino wamanya ukwasowa ukulipilwa. Ukulemba nu kupekanizizya ivya kuya mukulanda ku cilye. Nanti ciwe wo-o, ukupekanizizya amapepa nu kuya mukuluwulula ku koti camazile impindi nkulu ni ndalama imvule. Wa loya witu na wanawitu wanji, wamazile ama awala 380 wakupekanizizyavye ivyakuya mukulanda, apano na ma awazi 240 ayakupiliwulilavye ivya kuya mukulanda ku cilye ca Mexico. Mupipi na waloya 40 ukuzinguluka insi yonsinye wamazile ama awazi amavule pa kuwombela pe wo-o umulandu wa ku Ecuador. Uzye tukazana kwinye indalama izya kwavwilizizyamo awanawitu na wankazi. Akupitila mu misangulo yino mukasangulo ukuwomvya donate.pr418.com. Acino tukasalifya nkaninye pa mwezo winu uwakupa.