Phakathi kwabantu abanengi abahlala eLatin America, kulamamiliyoni abantu abasalandela amasiko abo njalo bekhuluma ulimi lwabo lomdabuko kuphela. Abanye babo ngoFakazi bakaJehova njalo labo bayawahlonipha amasiko abo. ELatin America kuhunyutshwa amabhuku ethu ngezindimi zomdabu ezingu-130 njalo abafowethu labodadewethu basebenzisa lawomabhuku ukuthi bafundise abantu bakibo ngoNkulunkulu. a Lanxa kunjalo, ukukhetha ukukhonza uJehova lokwala ukulandela eminye imikhuba engavumelani lokutshiwo liBhayibhili kubangele ukuthi abanye abafowethu labodadewethu baphikiswe ngabanye emaphakathini. Iminikelo yenu ibancede njani ezimeni ezinjalo?

 EMexico kulabafowethu labodadewethu abangumhlobo obizwa ngokuthi ngamaHuichol abahlala esigabeni esisezintabeni eJalico State. b Abafowethu laba bazondelwa kakhulu ngabanye emphakathini ngoba bala ukuhlanganyela kweminye imikhuba eyayingavumelani lokuseBhayibhilini futhi eyayizabatshiya belomzwangedwa ongahlanzekanga. Mhlaka 4 December 2017 oFakazi abasendaweni le kanye labanye abantu ababekhonapho bahlaselwa lixuku labantu ababezondile futhi belodlakela. Ixuku lelo labaxotsha emphakathini laphinda latshabalalisa lempahla yabo njalo labethusela lisithi ababezazama ukuphenduka babezabulawa.

 Abanye oFakazi abahlala ezindaweni eziseduze babamukela abafowethu laba emizini yabo futhi babanika lokunye ababekudinga ngalesosikhathi. Kodwa kuyini okwakungenziwa ukuze kuncediswe abafowethu laba ukuthi benelise ukubuyela kibo? Umfowethu okuthiwa ngu-Agustin uthi: “Sasifuna ukudinga igqwetha ukuze lisincedise kodwa imali esasilayo yayingeneli. Sasingakwazi lokuthi siye kubani ukuze sithole amacebiso avela ebantwini abazi ngezomthetho.”

 Igatsha leCentral America lahle lasukumela phezulu ukuze lincede abafowethu labodadewethu laba ababephikiswa ngenxa yokholo lwabo. Laqala ngokucela iziphathamandla zakuleyondawo ukuthi zidingisise okunengi ngendaba le. Ngemva kwalokho igatsha lathola imvumo evela kuKhomithi yabaHleli yeQula Elibusayo yokuthi lisebenze ndawonye loHlangothi Lwezomthetho olusemawofisini ethu amakhulu lokuthi indaba leyo ihanjiswe emthethwandaba. Yacina ifike lasemthethwandaba omkhulu futhi olamandla eMexico okuthiwa yi-Supreme Court of Justice of the Nation.

 Iqembu lamagqwetha avela emazweni atshiyeneyo lachasisela umthethwandaba lo ukuthi njengoba kukhangelelwe ukuthi abantu bonke nje bahloniphe abantu abalandela amasiko lemikhuba yabo yomdabuko, labobantu labo kumele bahloniphe abanye emphakathini futhi bazwisise ukuthi labo balelungelo lokuzikhethela. Phela bonke abantu balamalungelo kungelani lokuthi bahlala ngaphi.

 Mhlaka 8 July 2020 wonke amalunga omthethwandaba omkhulu waseMexico avumelana ukuthi oFakazi babeqondile endabeni le. OFakazi bonke ababexotshiwe banikwa imvumo yokuthi babuyele emizini yabo. U-Agustin esike sakhuluma ngaye uthi: “Sibonga singaqedi ngenxa yalokho esikwenzelwe yinhlanganiso, kuyasithokozisa kakhulu. Besingeke senelise ukwenza loba yini ngabe abafowethu abasincedisanga.”

 Abanye abahlangana lokuphikiswa okufananayo ngabafowethu labodadewethu abahlala e-Ecuador, endaweni okuthiwa yi-San Juan de lluman, ehlala abantu abanengi abadabuka esigodini sase-Otavalo. Ngo-2014 abafowethu laba bathola imvumo kuziphathamandla yokwakha iWolu yoMbuso njalo bahle baqalisa ukwakha. Lanxa kunjalo omunye umfundisi owayehamba labantu abedlula 100 wafika wamisa umsebenzi wokwakha ngenkani. Abantu emphakathini batshela abafowethu lodadewethu ukuthi bahle bayekele kusukela mhlalokho ukuhlangana ndawonye ukuze bakhonze.

 Abafowethu abakuhlangothi lwezomthetho egatsheni le-Ecuador basebenza labasemawofisini ethu amakhulu ukuze bancedise ibandla lelo ukuvikela amalungelo abo okukhonza bekhululekile. Bahambisa indaba le emthethwandaba futhi abantu emphakathini bahle bama ukuphikisa abafowethu njalo babavumela ukuthi baqhubeke ngokwakha lokungena imihlangano yebandla. Ukuze kungabi lohlupho olufananayo ngesikhathi esizayo, abazalwane abakuhlangothi lwezomthetho bacela ukuthi umthethwandaba omkhulu uhlolisise umbuzo othi: Abantu abalandela amasiko lemikhuba yabo yomdabuko kumele bawahloniphe yini amalungelo abanye abantu?

 Mhlaka 16 July 2020 umthethwandaba omkhulu wase-Ecuador obizwa ngokuthi yi-Constitutional Court of Ecuador wahlangana ukuze uhluze indaba le. Abafowethu base-Ecuador abangamagqwetha yibo ababemele ibandla leSan Juan llluman emthethwandaba, bekanye labanye abafowethu abane abangamagqwetha abavela emazweni atshiyeneyo futhi abalolwazi ngemithetho esebenza emhlabeni wonke. Kwasetshenziswa ezempucuko ukuthi amagqwetha la axhumane lomthwethwandaba ngoba ayengeke abekhona mathupha ngenxa yomkhuhlane weCOVID-19. Lokhu kwaba ngokokuqala ukuthi iqembu lamagqwetha elimela oFakazi bakaJehova lethule udaba lwabo emthethwandaba kusetshenziswa ezempucuko. c Abafowethu laba basebenzisa imithetho eyaziwayo esebenza emhlabeni wonke ukuze bacacise ukuthi ukuhlala emphakathini olandela amasiko omdabuko akutshintshi iqiniso lokuthi umuntu ngamunye kulowomphakathi ulamalungelo akhe okumele ahlonitshwe yibo bonke abantu.

 Okwakhathesi abafowethu abasesigodini se-Otavalo balindele ukuzwa isinqumo esizakhitshwa ngumthethwandaba omkhulu we-Ecuador. Bayabonga kakhulu ngendlela abancediswe ngayo kwaze kwaba khathesi. Omunye umdala webandla le-lluman Quicha okuthiwa nguCesar uthi: “NguJehova osebenzise inhlanganiso yakhe ukuthi enze into enkulu kangaka ukuze kuncedwe abantu abalutshwane!”

 Wonke amagqwetha abesenza umsebenzi lo angoFakazi bakaJehova njalo kawabhadalwa. Loba kunjalo, ukuhambisa amacala la emthethwandaba, ukuwalungiselela kanye lokuwethula phambi kwenkundla kudinga isikhathi lemali. Kwathatha amahora adlula 380 ukuthi amagqwetha ethu alungiselele njalo kwathatha amanye angu-240 ukuthi kuhunyutshwe okwakuzasetshenziswa emthethwandaba ngesikhathi kuhlolwa indaba yabofowethu baseMexico. Amagqwetha angaba ngu-40 asebenzisa isikhathi sabo esinengi kakhulu elungiselela indaba ye-Ecuador. Ivela ngaphi imali yokubhadala zonke izindleko zokuvikela amalungelo abafowethu? Ivela eminikelweni yenu eliyenza lisebenzisa izindlela ezitshiyeneyo okuhlanganisa laleyo eliyenza ku-donate.pr418.com. Siyalibonga kakhulu ngeminikelo le.