Egarhi k’emiliyoni y’abantu balama e Amérique Latine, muba emiliyoni y’abantu baderha olwabo-lwabo lulimi bajira n’ezabo nkomêdu. Muli bo muba bene wirhu na bali birhu banji, banaba bashagalukire enkomêdu zabo. Lyo barhabala abantu bamanye okuli kw’Ebibliya, bene wirhu banahindule ebitabu birhu omu ndimi 130 na kulusha ziderhwa e Amérique Latine. a Ciru akaba ntyo, bene wirhu na bali birhu banahagalikwe, bulya banacishoge okukolera Yehova n’okulahira okujira enkomêdu ziri lubero n’enyigirizo z’Ebibliya, zilugijirwa na bacikala b’eyo munda. Gurhi oburhabale bwinyu bukolesibwa lyo rhubarhabala?

 Omu Mexique, bene wirhu na bali birhu b’aba Huichol, balama omu eneo z’entondo z’e Jalisco, balahira okujira ebintu b’idîni ezamiri yabo yalibahanzize okujira. b Cikone oko kwagayisa bacikala baguma na baguma. Omu nsiku 4/12/2017, ecigusho c’abantu cayishirhera bene wirhu n’abandi bantu bal’ilamire nabo. Babalibirhako aha mwababwe, barhôla ebirugu byabo n’enyumpa zabo bazishabula banababwira oku bakacib’igaluka eyo munda banabaniga.

 Bene wirhu b’omu vile ziri hofi bashibirira bene wirhu na bali birhu ho n’aho. Cikone bici byakajijirwe lyo bacibigaluka emwababwe? Mwene wirhu Agustín, adesire ntya: “Rhurhagwerhe buhashe bw’okulonza avoka warhusambira, rhurhanalimanyire indi rhwakadosa amahano gayerekire e ehaki.”

 Etawi y’e Amérique Central yarhôla omuhigo g’okuhalira bene wirhu, bulya abantu bahagalika oluhûma lw’Abahamirizi ba Yehova lw’okuharamya. Burhangiriza, bahûna abakulu b’olugo oku bajire e enquête. Buzinda, ekomite y’Abaratibu y’Embaraza Eri Yalongoza yayemera oku bakole haguma na bene wirhu baba omu biro bihalira oluhûma lw’Abahamirizi biba oku biro birhu bikulu by’omw’igulu lyoshi lyo bahalira bene wirhu na bali birhu b’e Huichol. Bahêka olo lubanja oku Kagombe Kakulu k’Ehaki y’Ishanja, kagombe kakulu k’e Mexique.

 E ekipe ya ba avoka b’omw’igulu lyoshi barheganya ebi bayish’iderha, muli byo bahugûla oku, nk’oku bihûnyire okukenga enkomêdu ya bacikala, abantu bonene bashinganine okukenga n’okulanga oluhûma lwa ngasi cikala. Ehaki y’omuntu eshinganine ekengwe.

 Omu nsiku 8/7/2020, Akagombe Kakulu kaderha oku Abahamirizi ba Yehova bayazize. Kaderha oku ngasi balya boshi bakuzirwe aha mwabo bacibigaluka omu lugo lwabo. Agustín, rhwaganiriraga embere, edesire n’obushaluke oku baciyumvirhe, adesire ntya: “Rhushagalusire bwenene kuli ebi bene wirhu barhujirire, rhurhakahashire okucijirira ntyo.”

 Bene wirhu b’e San Juan de Ilumán, balama e Équateur omu hibanda hy’e Otavalo, emunda bacikala baba balamire, nabo balwisa okuhagalikwa kuli nk’oko. Omu mwaka gwa 2014, bene wirhu barhondera okuyubaka Enyumpa y’Entimanano, enyuma z’okuyemererwa oku bajire ntyo. Cikone ecigusho c’abantu 100 cakagilongozibwa na padri baseza Abahamirizi ba Yehova oku baleke okuyubaka. Bacikala bahanza bene wirhu oku barhacikag’ijira entimanano.

 Ebiro by’okuhalira oluhûma lw’Abahamirizi by’oku tawi y’e Équateur bakola haguma lyo bahalira oluhûma lwa bene wirhu lw’okuharamya. Bene wirhu bahêka olubanja oku tribinale. Kugerera oko bacikala baleka okuhagalika bene wirhu banabayemerera oku bacibirhondera okuja omu ntimanano n’okugendekeza omukolo gw’okuyubaka Enyumpa y’Entimanano. Lyo balanga ehaki ya bene wirhu y’omu mango gayisha, ba avoka birhu bahûna abatwi b’emanja bakulu oku baganirire aka kantu k’obulagirire: Ka bacikala b’eyo munda bashinganine okukenga ehaki y’omw’igulu lyoshi eyerekire ehaki z’omuntu?

 Omu nsiku 16/7/2020, Akagombe Kakulu k’Amarhegeko g’Équateur, kayumva lugenda ako kanga. Bene wirhu baba ba avoka balama e Équateur bagendiyimangira ecigamba coshi. Bene wirhu bani ba muli balya ba avoka baba balenga lugenda ehaki y’omw’igulu lyoshi bajibuganana n’ako kagombe. Enyanya z’obu bulwala bw’Ekorona, bakaganira na bihugo binji kugerera e vidéoconférence. Obo bo burhanzi etribinale yayemerera e ekipe y’okuhalira oluhûma lw’Abahamirizi b’omw’igulu lyoshi okurhimanana kugerera e vidéoconférence lyo bahalira oluhûma lwabo. c Eyo ekipe yaderha irhegeko liyerekine oku omuntu oli egarhi ka bacikala ashinganine agendekere ahâbwa ehaki yage.

 Bene wirhu b’omu hibanda hy’e Otavalo bagendekera balindirira oku Akagombe Kakulu k’Amarhegeko kaderha omuhigo kahizire. Bashagalukira bwenene n’oburhabale bahâbirwe. Mwene wirhu César, okola nka mugula omu Cigamba c’e Ilumán Quichua, adesire ntya: “Yehova n’ikubuliro lyage, bajirire bantu basungunu bintu binji.”

 Ba avoka bashibiriraga ako kanga boshi bali Bahamirizi, bashagalukire okukolesa obulenga bwabo lyo barhabala bene wabo, bajijire ntyo buzira kuhâbwa kantu. Cikone, okukomereza ba avoka n’okurheganya amasambo n’okugendisamba kwalihûnyire akasanzi n’ensaranga. Muli olo lubanja lw’e Mexique, bene wirhu na ba avoka birhu bayusize nsa 380 na kulusha lyo bacirheganya na kandi bayusize hofi nsa 240 bali bahindula madokima maguma na maguma omu lundi lulimi. Hofi ba avoka 40 b’omu bihugo biri lubero bayusize amagana g’ensa bali bakola oku lubanja lw’e Équateur. Ngahi ensaranga zakolesibagwa lyo rhuhalira oluhûma lwa bene wirhu na bali birhu zarhengaga? Zinakarhenga omu burhabale buhânwa omu kulunga okuboko omukolo gw’omw’igulu lyoshi. Obo burhabale bunajirwe kugerera donate.pr418.com. Rhumuvuzire omunkwa kuli obo buhânyi bwinyu.