ESELTERS, le Jarimani—Hi September 16, 2014, Nhlangano wa Brandenburg Memorials wu ta khoma xiendlakalo xo hlawuleka leswaku wu tsundzuka lembe ra vu-75 ra ku dlayiwa ka August Dickmann ekampeni ya nxaniso ya Sachsenhausen. A ku ri yena wo sungula ku dlayiwa erivaleni hi Manazi enkarhini wa Nyimpi ya Vumbirhi ya Misava hileswi a aleke ku ya enyimpini hikwalaho ka ripfalo rakwe.

Hi October 1937, Nkulukumba Dickmann u pfaleriwile ekampeni ya nxaniso ya Sachsenhausen hikwalaho ka tidyondzo leti a a pfumela eka tona tanihi Mbhoni ya Yehovha. Endzhaku ka masiku manharhu ku tlhekeke Nyimpi ya Vumbirhi ya Misava hi 1939, masocha ya Magestapo ma vitane Nkulukumba Dickmann ivi ma n’wi kombela leswaku a sayina khadi ra vusocha, leswi a swi ta endla leswaku a va evuthweni ra Jarimani. Loko a arile ku sayina khadi rero, u pfaleriwe exitokisini a ri yexe ivi mufambisi wa kampa a lava mpfumelelo eka murhangeri wa maphorisa ya SS leswaku a dlaya Nkulukumba Dickmann emahlweni ka vabohiwa lavan’wana hinkwavo va le kampeni. Hi September 15, 1939, Timbhoni ta Yehovha ta madzana swin’we na Heinrich, makwavo wa Nkulukumba Dickmann, va sindzisiwe ku hlalela loko va n’wi dlaya. Endzhaku ka masiku mambirhi, phepha-hungu ra The New York Times ri vike ku suka eJarimani ri ku: “August Dickmann, loyi a a ri ni malembe ya 29, . . . u duvuriwe laha hi ntlawa wa masocha.” Phepha-hungu rero ri tlhele ri vula leswaku a a gweviwe hileswi a aleke ku ya enyimpini “hikwalaho ka tidyondzo ta vukhongeri.”

Hi September 18, 1999, nsimbi ya xiphepherhele ya xitsundzuxo yo fundzha Timbhoni ta Yehovha to tlula 890 leti a ti pfaleriwile eSachsenhausen, yi beleriwe ehandle ka khumbi ra khale ka kampa ya nxaniso. Ku engetela kwalaho, ribye ra xitsundzuxo ri pfuriwile leswaku ku fundzhiwa Nkulukumba Dickmann.

Xiendlakalo lexi xo tsundzuka lembe ra vu-75 ra ku dlayiwa ka Nkulukumba Dickmann xi ta sungula endhawini leyi a dlayiweke eka yona ivi ku landzela mimbulavulo leyi nga ta nyikeriwa laha a ku ri khixi ra vabohiwa. Dokodela Detlef Garbe, mutsari tlhelo mufambisi wa Muako wa Xitsundzuxo eKampeni ya Nxaniso ya Neuengamme, u ta va xivulavuri lexi endzeke.

Media Contact(s):

International: J. R. Brown, Office of Public Information, tel. +1 718 560 5000

Germany: Wolfram Slupina, tel. +49 6483 41 3110

Afrika-Dzonga: Mzamo Goloda, +27 11-761-1000