MANILA, Pilipinas—Pinunan kan mga Saksi ni Jehova an sarong dakulang programa nin pagtugdok pagkatapos kan Super Typhoon Yolanda tanganing magtugdok o maghirahay nin 750 harong sa laog nin mayo pang sarong taon.

Si Dean Jacek na tagapagtaram kan Mga Saksi ni Jehova sa Pilipinas nagsabi: “Target ming matapos an pagtugdok pag-abot nin Setyembre 2014. Nagpuon an pagtugdok sa inot na mga bulan kan taon saka, sa tabang kan dakul na boluntaryo, natapos iyan bago magkatapusan nin Agosto.”

Nagtagama an Namamahalang Grupo kan mga Saksi ni Jehova nin pondo hali sa donasyon kan mga Saksi sa bilog na kinaban para mapondohan an proyekto nin pagtabang na ini. Nagbilog nin mga relief committee an sangang opisina kan mga Saksi sa Manila tanganing maorganisar an mga pagtugdok sa apektadong mga lugar. Kaiba digdi an pagtugdok o paghirahay sa 167 harong sa siyudad nin Tacloban, 256 na harong sa siyudad nin Ormoc, 101 harong sa siyudad nin Cebu, asin 218 harong sa siyudad nin Roxas. An boluntaryong mga paratugdok, na nagpartisipar sa proyektong ini may bilang na 522 na Saksi hali sa Pilipinas asin 90 Saksi hali sa ibang nasyon.

An representante kan Primero Distrito kan Leyte na si Mr. Ferdinand Martin G. Romualdez nagsabi: “An Mga Saksi ni Jehova an saro sa mga inot na non-government group na nagsagibo kan proyekto nin pagtugdok nin mga harong. . . . Kulang an mga tataramon para maipahayag an pasasalamat saka pag-apresyar kan pamilya mi asin kan samong mga kahimanwa.”

Media Contact(s):

International: J. R. Brown, Office of Public Information, tel. +1 718 560 5000

Philippines: Dean Jacek, tel. +63 2 411 6090