MANILA, Pilipinas—Kalpasan ti Napigsa a Bagyo a Haiyan, inrugi dagiti Saksi ni Jehova ti dakkel a proyekto a panangtarimaan ken panagibangon manen iti agarup 750 a balay iti agarup makatawen.

Inlawlawag ni Dean Jacek, a pannakangiwat dagiti Saksi ni Jehova iti Pilipinas: “Inkeddengmi a maileppas ti trabaho iti Septiembre 2014. Nangrugi ti trabaho a panagibangon iti umuna a paset ti tawen, ket babaen ti tulong ti nakaad-adu a volunteer, nalpas ti trabaho sakbay ti agtapos ti Agosto.”

Ti Bagi a Manarawidwid dagiti Saksi ni Jehova ket nangilatang iti pondo para iti proyekto. Naggapu daytoy a pondo iti donasion dagiti kapammatian iti intero a lubong. Nangbuangay ti sanga nga opisina dagiti Saksi iti Manila kadagiti komite ti saranay a mangorganisar iti trabaho a panagibangon manen kadagiti naapektaran a lugar. Karaman iti daytoy ti pannakatarimaan wenno pannakaibangon manen ti 167 a balay iti Tacloban City, 256 a balay iti Ormoc City, 101 a balay iti Cebu City, ken 218 a balay iti Roxas City. Dagiti boluntario a nakiraman iti trabaho ket buklen ti 522 a Saksi manipud iti Pilipinas ken 90 a Saksi manipud iti nagduduma a pagilian.

Kastoy ti komento ni Mr. Ferdinand Martin G. Romualdez, a kongresman ti Umuna a Distrito ti Leyte: “Dagiti Saksi ni Jehova ti maysa kadagiti immuna a non-government group a nangirugi iti trabaho a panagibangon manen kadagiti balay. . . . Napalaus ti panagyaman ken apresasion ti pamiliak ken dagiti kailiak.”

Media Contact(s):

International: J. R. Brown, Office of Public Information, tel. +1 718 560 5000

Pilipinas: Dean Jacek, tel. +63 2 411 6090