JANUARY 21, 2015
PHILIPPINES
Bapulukile ku Kinkunkwila kya Haiyan Mwaka Wapwa Baji mu Mazubo Akatataka
MU MANILA, ku Philippines—Bakamonyi ba kwa Yehoba bashimukulula nangwa kuwama mazubo 750 aonaikila na mambo a kinkunkwila kya Super Typhoon Haiyan mu mwakatu umo.
Bamingilo batanu bashimikilenga mazubo atanu mu mobatu atanu.
Ba Dean Jacek bambilako Bakamonyi ba kwa Yehoba mu Philippines bambile’mba: “Twibikijile kikonkwanyi kya kupwisha mazubo onse mu September mu 2014. Twatendekele uno mwingilo kuntendekelo ya mwaka, twaishile kupwisha mu August mambo bavula baishilenga na kwitukwasha.”
Bakamonyi bakonkakwa ne bafumine mu byalo bingi bo baingijilenga uno mwingilo.
Jibumba Jitangijila ja Bakamonyi ba kwa Yehoba japaine mali afumine ku bapopweshi bakwabo mwaya ntanda akukwasha uno mwingilo. Ofweshi wa Bakamonyi uji mu Manila walengele kavoto ka kutangijila mwingilo wa kushimukulula bishimikwa ku mpunzha kwapichile kinkunkwila. Mazubo amo beawamishetu. Bashimukulwile mazubo 167 mu muzhi wa Tacloban, 256 mu muzhi wa Ormoc, 101 ku Cebu ne akwabo 218 ku Roxas. Bakamonyi ba mu kyalo kya Philippines bepaine kwingilako uno mwingilo bajinga 522, kabiji Bakamonyi 90 bafumine mu byalo bikwabo.
Rep. Ferdinand Martin G. Romualdez, First District of Leyte.
Ba Ferdinand Martin G. Romualdez, bakilolo ba pa jikuji jo batela’mba First District of Leyte baambile’mba: “Bakamonyi ba kwa Yehoba ke jibumba jitanshi jabula ja kafulumende jibena kushimukula mazubo a bantu. . . . Ne byambo bya kwamba mfwabyo, amiwa ne kisemi kyami ne bantu bonse twasanta bingi.”
Media Contact(s):
International: J. R. Brown, Office of Public Information, tel. +1 718 560 5000
Philippines: Dean Jacek, tel. +63 2 411 6090