Diad loob na anem bulan manlapu la nen Marso 2018, say Korte Suprema na Uzbekistan tan say Administrative Court na Karakalpakstan, sakey ya akabiig ya republika diad Uzbekistan, et angipaakseb na desisyon ya pabor ed Saray Tasi nen Jehova diad saray kaso nipaakar ed kanepegan tayon mandayew. Binaliktad na Korte Suprema so desisyon na apatiran abeban korte ya aliwan pabor ed saray agagi tayo, tan binaliktad na Administrative Court so komaliman desisyon.

Pigara ed saratan ya kaso et lapud impangimbestiga na saray pulis tan impankompiska da ed saray nibase ed Biblia iran literatura, pati saray elektronikon gadyet ya wala ray kopya na Biblia. Bilang resulta, pinanmulta na saray abeban korte iray agagi ta say amta ra et ag-inunor na saray agagi so ganggan ya ibabaga ran agnayari so pangibunog na saray publikasyon nipaakar ed relihyon. Maong labat ta diad agano nin desisyon na saray atagey a korte et inabsuelto da iray agagi kanian agda la kaukolan so manbayar na multa.

Malikeliket iray Tasi ed interon mundo lapud saratan ya pananguman, misalsalamat iran maong ed saray autoridad tan lalo la ed si Jehova lapud panangigiya tan suporta to “diad panangidepensa tan pakaala na legal a kanepegan a mangipulong na maong a balita.”​—Filipos 1:7.