Jumamosi, Aprili 13, 2019, Ndugu Stephen Lett mshiriki wa Baraza Linaloongoza alitoa toleo lililorekebishwa la Biblia Takatifu—Tafsiri ya Ulimwengu Mpya katika Kijapani. Biblia hiyo ilitolewa katika mkutano wa pekee uliofanywa katika Uwanja wa Noevir Kobe ulioko Kobe, Japani, na watu 20,868 walihudhuria. Programu hiyo ilirushwa moja kwa moja kwenye Majumba manane ya Kusanyiko na Majumba mengi ya Ufalme katika eneo la ofisi hiyo ya tawi. Baadaye siku hiyohiyo na siku iliyofuata, video ya mkutano huo ilionyeshwa katika Majumba ya Ufalme kwa ajili ya wale ambao hawakuweza kuhudhuria iliporushwa moja kwa moja. Jumla ya watu 220,491 walifurahia mkutano huo wa pekee mwisho juma huo.

Tunafurahi pamoja na makutaniko na vikundi zaidi ya 2,950 vya Kijapani ulimwenguni pote ambavyo sasa vimepata tafsiri hiyo iliyorekebishwa, zawadi nzuri sana kutoka kwa Yehova kwa ajili ya funzo la kibinafsi na kwa ajili ya huduma.—Waebrania 4:12.

Tafsiri ya Ulimwengu Mpya imekuwepo nchini Japani kwa miaka 45. Mwaka wa 1973, Ndugu Lyman Swingle, ambaye alitumikia katika Baraza Linaloongoza, alitoa Tafsiri ya Ulimwengu Mpya ya Maandiko ya Kigiriki ya Kikristo katika Kusanyiko la Kimataifa la “Ushindi wa Kimungu” lililofanywa Osaka, Japani. Kwa miaka tisa baada ya toleo hilo kutangazwa, nakala 1,140,000 zilisambazwa, idadi hiyo ni mara 75 zaidi ya idadi ya wahubiri walikuwepo nchini Japani wakati huo. Mwaka wa 1982, toleo kamili ya Biblia Takatifu—Tafsiri ya Ulimwengu Mpya lilitolewa, Biblia hizo zilichapishwa na kujalidiwa nchini Japani. Sasa, toleo lililorekebishwa katika Kijapani la mwaka wa 2019 ni jambo lingine la pekee katika kazi ya watu wa Yehova ya kutafsiri Biblia nchini Japani.

Tafsiri ya Ulimwengu Mpya imetolewa ikiwa nzima au sehemu katika lugha 179, kutia ndani tafsiri 22 zilizorekebishwa kulingana na toleo la 2013 la Kiingereza.