Kena 19 April 2019, menyadi kitai ba serata Uzbekistan ngintu Ngingatka Pemati Jesus enggau enda belalai agi. Betaun-taun sebedau tu, mayuh ari sida enda ulih ngaga pengawa tu ba endur ti tebuka.

Saksi-Saksi Jehovah direjister sereta diterima ba Chirchik, siti endur ke semak Tashkent. Sebedau tu, bala menyadi ke ukai ba endur Chirchik bejalaika pengawa Ngingatka Pemati Jesus tu enggau belalai, kelebih agi ari piak ke bekuasa. Tang taun tu, bala menyadi kitai empu madahka ngagai piak polis, pasal sida deka ngintu Ngingatka Pemati Jesus. Indah, bala menyadi kitai ngelaluka bala piak ti bekuasa nya datai. Piak polis nerima pengawa tu, nyentukka sida nyaga pengelikun sepemanjai pengawa tu dipejalaika.

Menyadi Mark Sanderson ari Raban ti Ngiring meri cheramah maya Ngingatka Pemati Jesus ba Palan Gempuru di Chirchik, baka gambar ba atas. Pengawa tu disalinka ngagai jaku Rusia. Bisi 781 iku orang datai ngagai pengawa tu. Malam nya, bisi dua iti da agi pengawa Ngingatka Pemati Jesus dipejalaika.

Sepemanjai menyadi Sanderson ke datai ngabas, iya dijaga menyadi Paul Gillies ari pampang opis sereta dua iku menyadi lelaki ari Asia Tengah. Sida betemu enggau pegawai tinggi ari Ministry of Justice enggau The National Centre for Human Rights. Ba aum nya, bala menyadi kitai dikemendarka madahka penerang pasal pengarap sereta gerempung kitai. Kitai ngarapka penerang nya ulih meri kitai pemendar tauka direjister ba endur bukai kelimpah ari ba Chirchik. Enggau chara nya, bala menyadi kitai ulih minta pemendar deka nirika endur begempuru ke manah agi.

Pengawa Ngingatka Pemati Jesus ke diintu enggau enda belalai agi, sereta ulih betemu enggau pegawai tinggi nya dua iti pekara ti manah ke nyadi ba Uzbekistan. Pengelama enam bulan tu, serang ngenyit, ganti rugi, tauka nangkap Saksi-Saksi Jehovah nadai nyadi. Kira-kira setaun ti udah, pemesai Uzbekistan ke Amerika Serikat iya nya Javlon Vakhabov, mega meri penerang ti manah. Kena 14 Mei 2018, iya madahka ba mua pemerintah ke bukai, deka meri atur ke ulih ngenyenangka Saksi-Saksi Jehovah direjister.

Kitai ngarapka Jehovah merekat pengawa menyadi kitai ba Uzbekistan, ngambika sida ulih ‘diau likun dalam pemaik, nangi sereta bebasaka Petara ngena chara ti patut.’—1 Timoti 2:2.