JULY 5, 2019
RUSSIA
Khoti la ku Russia Lagamula Kuti M’bale Aleksandr Solovyev ndi Wolakwa
Lachinayi pa 4 July, 2019, khoti la m’boma la Ordzhonikidzevskiy lomwe lili mumzinda wa Perm’ ku Russia, linalengeza kuti M’bale Aleksandr Solovyev ndi wolakwa ndipo linalamula kuti alipire chindapusa cha ndalama zokwana madola 4,731 a ku America.
M’bale Solovyev anamangidwa pa 22 May, 2018 madzulo pamalo ena okwerera sitima pamene ankafika kuchokera kunja komwe anapita limodzi ndi mkazi wake Anna. Ndiyeno apolisi anamanga M’bale Solovyev ndi unyolo kenako anamutengera kundende ina yongoyembekezera. Apolisi anatenganso Mlongo Solovyev pa galimoto ina yosiyana ndi imene mwamuna wake anakwera. Apolisi anakachita chipikisheni m’nyumba yawo usiku wonse ndipo anatenga zithunzi, zipangizo zamakono, ndiponso Mabaibulo angapo.
Apolisi anafunsa mafunso Mlongo Solovyev ndipo anamuuza kuti azipita atapeza kuti alibe mlandu. Komabe, M’bale Solovyev anamutsegulira mlandu ndipo pa 24 May, anamulamula kuti akhale pa ukaidi wosachoka panyumba mpaka pa 19 November, 2018. Pa nthawi yoyembekezera mlandu wake, m’baleyu anauzidwa kuti alibe ufulu wochita zinthu zina.
Maloya a M’bale Solovyev akapanga apilo chigamulo choti m’baleyu ndi wolakwa. Iwo apemphanso kale Gulu la United Nations Loona za Anthu Omangidwa Popanda Zifukwa Zomveka kuti liunikenso mlanduwu.
Pamene chizunzo chikupitirirabe m’dziko la Russia komanso m’mayiko ena, ‘sitikuchita mantha m’njira iliyonse’ ndi otitsutsa. Tikukhulupirira kuti Yehova apitiriza kupatsa tonsefe zinthu zomwe tikufunikira kuti tipirire mpaka tsiku lake lalikulu lachipulumutso litafika.—Afilipi 1:28.
Mwina Mungakondenso Kudziwa Izi
NKHANI
Kucheza Ndi M’bale Dmitriy Mikhaylov
M’bale Mikhaylov anamangidwa pa 29 May2018 ndipo anakhala miyezi yambiri m’ndende akudikira kuzengedwa kwa mlandu wake. Iye akufotokoza mmene Yehova anagwiritsira ntchito mkazi wake pomuthandiza kupirira. Akufotokozanso kuti kuuza akaidi anzake mfundo za m’Baibulo kunamuthandiza kuti azikhalabe ndi mtendere komanso azisangalala.
NKHANI
A Dennis Christensen Akadandaula ku Khoti Loona za Ufulu wa Anthu ku Europe Kuti Lisinthe Chigamulo Chawo
Pa 23 May, 2019, Khoti la Mumzinda wa Oryol linagwirizana ndi chigamulo choti a Dennis Christensen akhale m’ndende. M’bale Christensen akadandaula za chigamulochi ku Khoti Loona za Ufulu wa Anthu ku Europe.