AGOSTO 5, 2019
PILIPINAS
Pilipinas, Dinayyeg ti Ginggined
Idi Hulio 27, 2019, dinayyeg ti dua a ginggined ti bassit nga isla ti Itbayat iti Pilipinas, agarup 690 a kilometro iti amianan ti Manila. Ti dua a ginggined ket immabut iti magnitude 5.4 ken 6.4. Siam a tao ti natay, 64 ti nadangran, ken 266 a balay ti nadadael. Kuna dagiti opisial a 2,968 a tattao ti naapektaran kadagiti ginggined.
Awan kadagiti kabsattayo ti natay, ngem maysa a sister ti nadangran ngem saan unay a nakaro. Dua met a balay dagiti kakabsat ti nakaro ti pannakadadaelna.
Nangbukel ti sangay iti Disaster Relief Committee, a daytoy ti nangorganisar iti pananggatang ken panangiwaras kadagiti kangrunaan a kasapulan dagiti kakabsat kas iti makan ken danum. Bimmisita dagiti pannakabagi ti sanga nga opisina kadagiti naapektaran a kakabsat tapno liwliwaen ken tulonganda ida.
Ikararagantayo dagiti kakabsattayo a naapektaran iti nabiit pay a ginggined. Ammotayo a ni Jehova, ti “Dios ti amin a liwliwa,” kanayon nga ipaayna dagiti kasapulan ti kakabsattayo.—2 Corinto 1:3.