2019, August 16 Htai mungdan, Nong Hai hta galaw ai ginwang zuphpawng hta Lao amyu ga hku nna Mungkan Nnan Ga Gale Chyum Laika Greek Chyum hpe Yehowa Sakse ni dip shapraw wa ai. Ginjaw Garan Rung Komiti Hpung kaw na hpunau Plakon Pestanye gaw, zuphpawng a shawng nnan shani hta Chyum Laika hpe shapraw dat ai.

Marai masum lawm ai ga gale hpung kaji gaw, dai lit hpe laning mi chyen galaw wa ma ai. Ga gale ai marai langai ndai hku tsun ai: “Ga gale Chyum Laika a akyu gaw, Lao amyu masha ni ya aten hta shaga ai ga hte Chyum Laika shiga hpe atsawm chye na hkra madun dan nna madung amyu ga a lachyum mung tup hkrak naw lawm nga ai majaw, Chyum Laika sharin ai ni gaw ‘Karai Kasang a sung htum ai lam’ ni hpe chye na lu ai.”​—Yob 11:7.

Ndai ga gale Chyum Laika hta, Chyum Laika ga yan ni hpe grau chye na hkra sang lang dan ya ai ga nhpaw ni hte laksan Chyum daw ni hpe, laika hti ai ni aloi sha tam mu na matu, karum ya ai ga si matsun (Index) zawn re ai hkaja hkingrai ni mung lawm ai. Karum ya ai kaga langai mung ndai hku tsun ai: “Ndai ga gale Chyum Laika hpe Chyum Laika sharin lamang hta lang ai shaloi, ahkyak ai madung lam ni hpe moi na hta grau nna Chyum ga sharin ni chye na wa na re. Dai gaw shanhte hpe masin hkra ya nna, Yehowa hpe marai hkum langai zawn tsawra ai myit nga wa hkra karum ya na re.”

Mungkan Nnan Ga Gale Chyum Laika Greek Chyum gaw, “mai kaja ai magam bungli shagu hpe galaw na matu atsam hpring nna lang ra ai hking rai ni hte hkrak” rai lu na matu Lao ga shaga ai hpunau nauna ni hpe karum ya na ngu anhte kam ai.​—2 Timohti 3:16, 17,NW.