Ena mataka ni Sigatabu na imatai ni Seviteba, 2019 e vakacaca na cagilaba kaukaua o Dorian e Great Abaco Island ena noca kei Bahamas. Qori e dua na cagilaba kaukaua me ravuta na Wasa na Atalanitika, e tiko na kena kaukaua ena ivakatagedegede 5. E vakarerevaki na cagilaba qo ni toso vakamalua, kaukaua na cagi, bisa tale ga na uca. E ravuravu tale ga e Leeward Islands, Puerto Rico, kei Virgin Islands, ia e sega ni levu na ka e vakacacana.

E se vakumuni itukutuku tiko na valenivolavola ni tabana e Merika me baleta na vakacaca ni cagilaba vei ira na tacida, vaka kina na itikotiko e taukena na valenivolavola ni tabana. Ena gauna qo, se sega ni dua e mavoa vei ira na le 46 na dautukutuku ena rua ivavakoso e Great Abaco Island. Ia e vakacacani na Vale ni Soqoni duadua ga e tiko kina.

E tiko e Grand Bahama Island e va na ivavakoso, era le 364 na dautukutuku era lewena. E ripotetaki taumada nira sa tokitaki e le 196 na tacida, e vakacacani tale ga e 22 na vale. Tolu na vale sa vakacacani sara ga vakadua.

E vakarautaka na valenivolavola ni tabana na idusidusi ni draki ca vei ira na ivakatawa dauveilakoyaki, kei ira na qase ena vanua e vakacacani. E vakatututaka tale ga mera toki na tacida kece ena siti o Nassau, se vakarurugi ena so tale na vanua.

Meda masulaki ira mada ga na tacida era vakacacani ena cagilaba qori. Eda kila ni raica vinaka tu o Jiova na veika dredre era sotava tiko, ena vakayaloqaqataki ira tale ga mera vosota na gauna lewalewai dredre qori.—Same 46:1, 2.