Ang Eritrea isa sa mga lugar diin naeksperiensiahan sang mga Saksi ni Jehova ang pinakagrabe nga paghingabot sa sining moderno nga tion. Sang Septiembre 17, 2019, ang tatlo ka brother, nga sanday Paulos Eyasu, Isaac Mogos, kag Negede Teklemariam, 25 ka tuig na nga napriso. Magluwas sa ila, may 39 pa ka brother kag 10 ka sister nga napriso man.

Ang tanan naton nga kauturan nga ara subong sa prisuhan wala ginpasakaan sang bisan ano nga kaso, wala makaatubang sa korte, kag wala man masentensiahan. Wala sila kabalo kon san-o sila paguaon. Apat ka brother na ang napatay sa prisuhan, kag tatlo ang napatay sa tapos sila makagua bangod sang ila grabe nga pag-antos sa prisuhan.

Ang paghingabot sa Eritrea nagbaskog gid sugod sang Oktubre 25, 1994. Mga isa pa lang sadto ka tuig kag tunga nga nangin independiente ang Eritrea sa paggahom sang Ethiopia. Gindeklarar sang bag-o nga presidente nga ang mga Saksi ni Jehova nga natawo sa Eritrea indi na pagkilalahon nga citizen sang pungsod, bangod lamang sa mabakod nila nga panindugan nga magpabilin nga neutral bilang mga Cristiano. Ginkuha man sang presidente ang madamo nila nga legal nga mga kinamatarong. Bangod sini, indi na sila makatapos eskwela, makanegosyo, ukon makakadto sa iban nga pungsod.

Sining karon lang nga mga tinuig, ang kilala nga mga human rights organization nagsiling nga hungod nga ginbalewala sang Eritrea ang mga kinamatarong sang tawo nga ginakilala sang kalabanan nga pungsod. Lakip sa sini ang mga kaso sang aton mga kauturan didto. Wala gid ginsunod sang Eritrea ang rekomendasyon sini nga mga organisasyon.

Tan-awa: “SPECIAL REPORT: Ang Paghingabot sa mga Saksi ni Jehova sa Eritrea”

Padayon naton nga pahibaluon ang mga opisyal sang gobierno kag ang iban pa nga ara sa awtoridad parte sa nagakatabo sa Eritrea. Samtang padayon nga ginapakita sang aton kauturan ang pagtuo kag kaisog sa sining mapintas nga paghingabot, nagasalig kita kay Jehova bilang ila Manugbulig kag “igang nga dalangpan.”—Salmo 94:22.