Ena ika17 ni Okotova 2019, e vakatulewataka na Mataveilewai me baleta nodra dodonu na lewenivanua e Urope (ECHR), ni sega ni dodonu me ratou totogitaki na tacida e Azerbaijan ni ratou sega ni via vakaitavi ena mataivalu. E vakadeitaka na mataveilewai, na nodra totogitaki o ira na sega ni via vakaitavi ena ivalu, e beci kina nodra dodonu me baleta na lewaeloma, vakasama, kei na lotu. Qo e imatai ni lewa e tauca na ECHR me totaki ira na iVakadinadina i Jiova e Azerbaijan.

E yavutaki na vakatulewa qori ena va na duidui kisi e yaco ena 2008 ina 2015. Na kisi kece qori e baleti ratou na lima na tacida, o Mushfig Mammadov, Samir Huseynov, Farid Mammadov, Fakhraddin Mirzayev, kei Kamran Mirzayev. E laurai ni ratou cala, qai bala e valeniveivesu ni ratou sega ni via vakaitavi ena mataivalu e Azerbaijan. Ni ratou sega ni via vakaitavi ena mataivalu na tacida ena vuku ni nodratou vakabauta vakalotu, eratou dikeva na Mataveilewai ni beca na matanitu o Azerbaijan na veidinadinati e vauca nodra dodonu na lewenivanua e Urope (European Convention on Human Rights). E tu eso tale na cakacaka era rawa ni qarava na sega ni via vakaitavi ena ivalu, ni sega ga ni yalani na cakacaka qori vei ira na italatala, se vei ira na gonevuli era vuli ena koronivuli ni lotu. E kaya tale ga na mataveilewai ni dodonu me sauma lesu na matanitu na ilavo vei ira na tacida era veilewaitaki.

E vakamacalataki tale ga ena veilewai, ni gauna e lewe kina ni Matabose kei Urope ena 2001 na matanitu o Azerbaijan, e vakadonuya vakalawa na cakacaka e vauci ira na sega ni via vakaitavi ena ivalu. Kuria ya, e vakarautaka tale ga na matanitu na yavu ni vakavulewa me baleta na cakacaka qori vei ira e veisaqasaqa nodra vakabauta kei na veiqaravi vakamataivalu. Ia se bera ni cakava na matanitu e dua na lawa e vauca na cakacaka qori, ena gauna qo era se beitaki tiko na tacida nira sega ni via vakaitavi ena ivalu.

Eda nuitaka nira na saga sara na vakailesilesi ni matanitu o Azerbaijan, mera muria na vakatulewa ni mataveilewai me baleta na cakacaka e vauci ira na sega ni via vakaitavi ena ivalu. Meda nanumi ira mada ga na tacida e Azerbaijan ena masu, mera qaravi Jiova tiko ga ena yaloqaqa.—Same 27:14.