Sang Oktubre 17, 2019, ang European Court of Human Rights (ECHR) nagdesisyon nga ang aton mga brother sa Azerbaijan nga nangindi nga magsoldado bangod sang konsiensia indi dapat pagsilutan bilang mga kriminal. Ang desisyon sang Korte pareho man sa desisyon sang iban pa nga mga korte nga nagakilala nga ang pagsilot sa isa nga nagapangindi nga magsoldado bangod sang konsiensia supak sa kinamatarong sini sa kahilwayan sang konsiensia, panghunahuna, kag relihion. Amo ini ang una nga desisyon sang ECHR nga pabor sa mga Saksi ni Jehova sa Azerbaijan.

Ini nga desisyon naaplikar sa apat ka lainlain nga mga kaso nga natabo sugod sang 2008 asta 2015. Mga kaso ini sang lima ka brother nga sanday Mushfig Mammadov, Samir Huseynov, Farid Mammadov, Fakhraddin Mirzayev, kag Kamran Mirzayev. Ang kada isa sa ila ginpamatbatan nga nakasala kag ginpriso sa Azerbaijan bangod nangindi sila nga magsoldado. Ang Korte nagsiling nga ang aton mga brother nangindi nga magsoldado bangod sang ila “sinsero nga relihioso nga mga pagpati,” gani ang ginhimo sa ila sang gobierno sang Azerbaijan pagsupak sa European Convention on Human Rights. Ang Korte nagsiling man nga ang alternative service indi lang para sa mga ministro kag mga estudyante sang relihioso nga mga institusyon. Nagsiling pa gid ini nga ang gobierno sang Azerbaijan dapat magbayad sing danyos sa mga brother nga ila ginpriso.

Ginpaathag sang Korte nga sang ang Azerbaijan nangin bahin sang Council of Europe sang 2001, nagpromisa ini nga maghimo sing layi parte sa alternative civilian service. Dugang pa, ang Konstitusyon sang Azerbaijan nagasiling nga ang mga tawo nga mangindi nga magsoldado bangod sang pagtuo may kinamatarong nga maghimo sing alternative civilian service. Pero ang gobierno wala gihapon nakahimo sing layi parte sa alternative civilian service, kag ang aton mga brother ginapamatbatan gihapon nga mga kriminal bangod indi sila magsoldado.

Nagalaum kita nga ang desisyon sang Korte magapahulag sa gobierno sang Azerbaijan nga maghatag sing alternative civilian service. Samtang wala pa ini, ginapangamuyo naton nga ang aton mga brother sa Azerbaijan magpadayon sa pag-alagad kay Jehova nga may kaisog.—Salmo 27:14.