Kena 17 Oktober 2019, Kot Eropah ke Bekaul enggau Hak Mensia setuju enggau bala menyadi kitai ba Azerbaijan, ke enggai enggau pengawa soldadu ketegal sida ngasaika nya ulih ngachau pengarap sida. Pia mega, sida enda dituduh penjenayah. Pemutus tu ngeringka agi pengelepas hak sida ba asai ati, runding, sereta hak sida ba pengarap. Tu meh keterubah iya Kot Eropah ke Bekaul enggau Hak Mensia nyukung bala Saksi-Saksi Jehovah ba Azerbaijan.

Pemutus tu asil ari pengeran ati lima iku menyadi kitai ke bebendar ngetanka diri ba entara taun 2008 nyentukka taun 2015. Nama bala menyadi kitai nya, Mushfig Mammadov, Samir Huseynov, Farid Mammadov, Fakhraddin Mirzayev, enggau Kamran Mirzayev. Sida dikumbai besalah sereta dijil ba Azerbaijan laban enggai enggau pengawa soldadu. Kot mega madahka, bala menyadi kitai nulak pengawa nya ketegal pengarap sida ti lurus. Nya kebuah perintah Azerbaijan dikumbai ngelanggar ukum ari Kot Eropah ke Bekaul enggau Hak Mensia, laban ngukum sida. Kot nya mega madahka, hak tu ukai semina diberi ngagai tuai pengarap tauka orang ke belajarka pasal pengarap aja. Nambahka nya, Kot Eropah ke Bekaul enggau Hak Mensia mega ngasuh perintah Azerbaijan mayar ganti rugi ngagai bala menyadi kitai ke diukum sida nya.

Kot Eropah nya mega bisi madahka, perintah Azerbaijan kala besemaya deka ngemendarka orang milih kediri empu sereta enda ulih dipejal enggau pengawa soldadu. Tang nyentukka diatu, perintah din lalu bedau ngaga atur baka ke udah disemayaka sida, nya kebuah bala menyadi kitai dikumbai besalah.

Kitai ngarapka pemutus ari Kot Eropah ke Bekaul enggau Hak Mensia ulih meransang perintah Azerbaijan, ngamatka semaya ti udah kala digaga sida pasal hak orang bibas milih enggai nerima pengawa soldadu. Tang sebedau nya, kitai besampi ngambi bala menyadi kitai ba Azerbaijan ulih terus berani nyembah Jehovah.—Masmur 27:14.