Evaọ Ọvo 12, 2020, enwo ọrrorro ọ rra no ugbehru jọ nọ a re se Taal nọ ọ rrọ Batangas ze evaọ Philippines. Enwo na ọ rra kpehru te emaele izii, onọ u dhesẹ nọ ugbehru na o sae sa zue. Egọmeti ọ tẹ ta kẹ ahwo nọ a be rria kẹle ugbehru na nọ a kwa keme ugbehru na o rẹ mae sa evaọ usu igbehru nọ e rrọ orẹwho na.

Anwọ oke yena ze, Isẹri Jihova nọ i bu vi egba isoi (500) a kwa no iwou rai no, a kwa kpohọ Egwa Uvie gbe iwou Isẹri Jihova efa nọ i thabọ no oria nọ ugbehru na o rrọ yọ ọvuọvo evaọ usu rai ọ nwoma ha. Ogbẹgwae Uwou Ogha orẹwho na o rehọ Ogbẹgwae Obufihọ kẹ Ahwo nọ Eware Okpẹtu E Via Kẹ mu no re u fiobọhọ kẹ inievo nọ e kwa no iwou rai na.

Ma be lẹ roro inievo mai nọ e rrọ obọ Philippines re a gbẹ hai fievahọ Jihova, keme ọye họ “oria adhẹzọ mai gbe ẹgba mai.”—Olezi 46:1-3.