Vbe April 7, 2020, Avbe Osẹe Jehova hia ni rre uhunmwu otagbọn keghi do Ugie Ayere ọghe uwu Jesu, agharhemiẹn wẹẹ emianmwẹ coronavirus wa ye vẹwae khian. Zẹ vbene Ọtẹn Nokpia Stephen Lett nọ re ọkpa vbe Ẹbu Nọ Su khare: “Emianmwẹ rhọkpa i rrọọ nọ khian sẹtin da ima obọ yi, ne ima ghẹ gbọyẹmwẹ ye emwi ne Jehova kevbe Jesu he ru ne ima, emianmwẹ rhọkpa i vbe rrọọ nọ khian sẹtin da ima obọ yi ne ima ghẹ do Ugie Ayere Ọghe Uwu Jesu.” De vbene ẹmwẹ nii ya sẹ hẹ vbe ukpo na?

Ọna keghi re ẹghẹ okaro na ya mu ẹnrẹn ye ugha iyẹn, vbene etẹn ima ya do Ugie Ayere hẹ, rhunmwuda emianmwẹ na tie ẹre coronavirus. Ma gha guan kaẹn vbene a ya do Ugie Ayere hẹ vbe igiogbẹ ọghe Avbe Osẹe Jehova kevbe vbe abotu nọ rre United States.

Rhunmwuda ne arriọba na wẹẹ ne emwa ghẹ ghi gbẹbu do iko, Ẹbu Nọ Su ne etẹn hia ni ga vbe Bẹtẹl danmwehọ ọta ọkpa ọghe Ugie Ayere. Ọgbẹlẹzẹ nọ rre Warwick ẹre a na ya ọta na guan. Ọtẹn Nokpia Anthony Morris ẹre ọ ya ne ọta guan. Ughugha, ẹre etẹn ni ga vbe abotu nọ rre United States ke danmwehọ ọta nii. Agharhemiẹn wẹẹ, emwa ni rri eka kevbe ni da ayọn vbe ugie ayere i bun, te a ye ghae eka kevbe ayọn ọghe Ugie Ayere gba etẹn hia ni rre Bẹtẹl obọ.

Etẹn ni ga vbe Bẹtẹl keghi ya videoconference deba iko iran vbe ẹdẹ Ugie Ayere. Deba ọni, avbe ediọn ni ga vbe Bẹtẹl, ni khian ya ọta guan ẹdẹrriọ, keghi ya videoconference rhie ọta ọghe iran ma.

Etẹn nibun ni ga vbe Bẹtẹl keghi kha wẹẹ, iran wa sọyẹnmwẹ Ugie Ayere na ru vbe ukpo na, rhunmwuda odẹ ne kpataki ẹre a ya do ẹre. Agharhemiẹn wẹẹ iran ma sẹtin deba etẹn nikẹre si egbe koko ẹdẹrriọ, sokpan zẹ vbene iran ya yee ẹre rre, odẹ ọyunnuan eva ne Jehova kevbe Ovbi ẹre ighẹ Jesu ya rhie ahoẹmwọmwa ma ima, ọ na yevbe te etẹn hia vbe otagbọn gba do Ugie Ayere na kugbe.​—Jọn 3:16; Matiu 20:28.