Na meiu di kel situason di koronavírus, na dia 7 di abril di 2020, Tistimunhas di Jeová na mundu interu faze Komemorason di mórti di Jizus Kristu. Sima irmon Stephen Lett, ki é di Grupu Enkaregadu di Óbra, fla: “Ka ten ninhun vírus ô duénsa na kel mundu li ki ta pô-nu ka mostra nos gratidon pa kuzê ki Jeová ku Jizus dja faze pa nos ô ka dexa-nu faze Komemorason di mórti di Jizus Kristu.” Modi ki nu odja ma kel-li é verdadi na kel anu li?

Kel-li é primeru di un grupu di artigu di nos pájina di Notísias ki ta ben mostra modi ki nos irmons na mundu interu faze Komemorason duránti koronavírus. Na es primeru artigu, nu ta ben odja modi ki Komemorason fazedu na Sédi Mundial di Tistimunhas di Jeová i na kes filial di Mérka.

Pa obi ku kes limiti ki govérnu poi pamodi koronavírus, Grupu Enkaregadu di Óbra disidi ma envês di ten Komemorason na Salon di Reinu, ta tinha un prugrama di Komemorason pa família di Betel. Irmon Anthony Morris faze kel diskursu na Salon di runion na Warwick. Tudu betelita di Mérka tevi xansi di odja kel prugrama na ses kuartu. Nbóra é poku algen ki ta kume kel pon i bebe kel vinhu, skritóriu di Betel ranja pon ku vinhu pa tudu família di Betel na Mérka.

Kes betelita tanbê podia sisti prugrama di Komemorason ku ses kongregason através di vídiu. Kes betelita ki é ansion tanbê dadu xansi di faze diskursu di Komemorason pa ses kongregason através di vídiu.

Txeu irmon di família di Betel fla ma kel Komemorason li foi un di kes más spesial ki dja es sisti. Nbóra es ka ta podia sta djuntu ku irmons, es xinti unidu ku irmons na mundu interu na Komemorason, pamodi nos tudu nu staba ta lenbra di kes dôs algen ki mostra-nu más amor, ki é nos Deus Jeová, i se Fidju ki el krê txeu, Jizus Kristu. — João 3:16; Mateus 20:28.