Era vakananuma na mate i Jisu ena vidio e 27 na dautukutuku ena ivavakoso o Iqaluit ena veiyatu yanuyanu e vakatokai na Arctic Archipelago, e Kenada. E 55 kece na nodra vuli iVolatabu na tacida ena ivavakoso qori, e 12 era sarava na ivunau ni iVakananumi ena vidio. Dua na ka nodra marautaka.

E dredre vei ira e levu na vuli iVolatabu mera tiko ena iVakananumi nira tu vakayawa. E vakaitamera na yalava qori ni tekivu mai na koro o Kimmirut me yaco sara i Grise Fiord, na itikotiko yawa duadua ena vualiku kei Kenada.

E kaya o Brother Isaac Demeester, e dua na qase ni ivavakoso e Iqaluit: “Na yabaki qo se qai imatai ni gauna mera tiko kina ena iVakananumi na vuli iVolatabu. E dua na vuli iVolatabu e Grise Fiord e sureta e le 4 me ratou sarava tale ga na ivunau ni iVakananumi. Koya gona, eratou sarava tale ga na ivunau ni iVakananumi e lima mai na vualiku ni noda vuravura.”

Era vakadinadinataka na mataveitacini ena ivavakoso o Iqaluit na yaga ni nodra tu vakarau mera veisau ena vakatatabu ni COVID-19.

E kaya o Sister Kathy Burechailo: “Keimami vunau ena talevoni vei ira na vakaitikotiko ena tokalau ni Arctic. Totoka sara ga na veitalanoa kei ira na tu vakayawa ena neitou yalava, era tu ga e vale, era vinakata tu na vakacegu.”

E kaya o Sister Laura McGregor: “Dua na ka e dau vakavu lomaocaoca vei keimami e Iqaluit ni keimami tu vakayawa, qai dredre na bula vakailavo, e leqataki tale ga na bula ena tete ni matedewa qo. Qo se qai matai ni gauna me keitou bulia kina vakavuvale na madrai ni iVakananumi. Keitou marautaka dina na gauna qori, ni keitou vakavinavinakataka kina vakalevu na rawarawa ni kena tuvanaki na soqo qo, e rawarawa tale ga na kena vakarautaki na waini kei na madrai.”

Sa qai tinia o Brother Demeester: “Eda sega ni rawa ni sota ena vuku ni matedewa na COVID-19, ia e vakasakiti dina na neimami duavata vakaivavakoso ena gauna ni iVakananumi. E duatani sara ga na iVakananumi ena yabaki qo!”

Era rai vakanamata tu na ivavakoso e Iqaluit me tara na nodra Vale ni Soqoni ena dua na gauna mai qo, ke vakatara na ituvaki. Ia ena gauna mada ga qo, eda kila ni na vakalougatataka o Jiova na nodra sasaga mera vunautaka kina na itukutuku vinaka ena dua na vanua yawa sara kei vuravura, oya na vualiku kei Kenada!—Cakacaka1:8.