Bisi 27 iku penginjil ba eklisia Iqaluit di Kutub Utara Kanada datai begulai ngintu pengawa Ngingatka Pemati Jesus ngena video call. 12 iku ari 55 iku pemelajar Bup Kudus ba eklisia nya amat gaga ati laban ulih ngintu pengawa ti spesial tu nengah video call.

Mayuh ari pemelajar Bup Kudus nya amat tusah, tauka, sigi enda ulih datai ngintu Pengawa Ngingatka Pemati Jesus enti begulai enggau eklisia. Nya ketegal sida diau ba endur nginjil ti pemadu jauh ari eklisia. Kandang alai eklisia Iqaluit nginjil nya amat besai, 772,204 batu sekuil, kenyau ari Kimmirut ngagai Grise Fiord, iya nya, komuniti ti pemadu utara di menua Kanada.

“Tu meh kali keterubah bala pemelajar Bup Kudus kami ulih meda program Ngingatka Pemati Jesus. Seiku pemelajar di Grise Fiord ngemai empat iku orang bukai mega meda program nya, nyadi, bisi lima iku orang ke diau ba utara sekali dunya, sama enggau Ngingatka Pemati Jesus,” ku Menyadi Isaac Demeester, seiku tuai gempuru ari eklisia Iqaluit.

Penekul ketegal COVID-19 udah ngasuh mayuh menyadi ba eklisia Iqaluit beratika penguntung ke diulih sida lebuh ngayanka diri nemu berubah.

Menyadi Kathy Burechailo ngenang: “Kami nginjil ngagai orang di serata begian timur kutub utara ngena talipun. Aku udah bisi randau ti amat manah enggau orang ba endur kami nginjil ti pemadu jauh. Semua orang diau ba rumah, lalu sida begunaka pengelantang ba ati.”

“Di Iqaluit, penanggul bekaul enggau penyakit berampit tu mai mayuh penusah, kelebih agi ba penatai pemisi, lalu kami enda nemu nama deka nyadi ba kami,” ku Menyadi Laura McGregor. “Tu meh kali keterubah kami sebilik ngaga roti ti enda beragi kena Ngingatka Pemati Jesus. Kami amat rindu begulai maya nya. Tu mega nulung kami mereti agi, naka meh penyenang kami ngintu pengawa tu, lalu pia mega, ngulihka roti enggau wain nya enggau senang pan siti berekat.”

Ku Menyadi Demeester nerangka: “Taja pan kami diserara ketegal COVID-19, aku amat alit ati meda penyerakup sereta pengerapat eklisia kami ba maya tu. Pengawa Ngingatka Pemati Jesus kena taun tu ngubah pengidup kami!”

Eklisia Iqaluit enda sabar nganti maya ila Palan Gempuru sida empu ulih didirika, nitihka gaya pengudah penanggul penyakit tu lenyau. Ke diatu, kitai andalka Jehovah deka merekatka sida ke ransing sereta bagas nusui Berita Manah ngagai endur ti pemadu utara di Kanada, ti ulih dikumbai “ujung dunya”!—Kereja Rasul 1:8.