Ti 27 nga agibumbunannag iti Iqaluit Congregation, iti Arctic Archipelago iti Canada, sinelebraranda ti Memorial babaen ti videoconference. Addaan ti kongregasion iti 55 nga iyad-adalan iti Biblia, ket 12 kadakuada ti nakabuya iti programa ti Memorial ket maragragsakanda unay iti dayta.

Marigatan wenno imposible pay ketdi a makaatender ti dadduma a mayad-adalan iti mismo a pakaangayan ti Memorial. Ngamin, agnanaedda iti nakaad-adayo a paset ti teritoria ti kongregasion, a dua a milion a kilometro kuadrado (772,204 sq mi) ti kalawana manipud Kimmirut agingga iti Grise Fiord—ti kaamiananan a komunidad ti Canada.

Kuna ni Brother Isaac Demeester, a maysa a panglakayen iti Iqaluit Congregation: “Ita pay la a tawen nga adda dagiti mayad-adalan a nakaatender iti Memorial. Maysa a mayad-adalan idiay Grise Fiord ti nagawis iti uppat a sabali pay tapno makiraman babaen ti videoconference, isu a lima amin a tattao manipud iti tuktok ti lubong ti nakiraman kadakami iti Memorial.”

Gapu iti naidumduma a kasasaad nga epekto ti COVID-19 pandemic, nakita dagiti kakabsat iti Iqaluit Congregation dagiti pagimbagan ti panagbalin a mannakibagay.

Malagip ni Sister Kathy Burechailo: “Tinawaganmi dagiti agnanaed iti makindaya a paset ti Arctic. Nagmayat ti pannakitungtongko iti dadduma kadagiti aggigian iti kaadaywan a paset ti teritoriami. Adda dagiti tattao iti balayda ken kasapulanda ti liwliwa.”

“Ditoy Iqaluit, makapa-stress no addaka laeng iti balay aglalo ta nagrigat ti biag ken dimi ammo no ania pay ti mapasamak gapu iti daytoy pandemic,” kuna ni Sister Laura McGregor. “Damomi ti agaramid iti tinapay nga usaren ti pamiliami para iti Memorial. Nakaragragsakkami a nakapagkakadua. Gapu iti dayta, ad-adda a naapresiarmi ti kinasimple daytoy nga okasion, ket talaga a bendision ta naaddaankami kadagiti usarenmi nga emblema.”

Kuna met ni Brother Demeester: “Nupay saankami a makapagkakadua nga agkakakongregasion gapu iti COVID-19, nagsayaat a makita nga ad-adda a nagbalinkami a nadekdekket iti maysa ken maysa bayat ti panawen ti Memorial. Talaga a nagdakkel ti epekto ti Memorial ita a tawen!”

Mangnamnama ti Iqaluit Congregation a dandanidan maibangonan iti baro a Kingdom Hall no ipalubos ti kasasaad. Kabayatanna, ammotayo a bendisionan ni Jehova ti panagreggetda a mangidanon iti naimbag a damag iti kaamiananan a rehion ti Canada, a maysa a kaadaywan a paset ti daga!—Aramid 1:8.