Iwhowho-uvie udhegbihrẹ e rrọ Ukoko Iqaluit evaọ ofẹ Canada jọ nọ a re se Arctic Archipelago nọ ikoliko e vọ. Yọ ividio ahwo ukoko na soso a ro thuru kugbe ohwohwo ro ru Ekareghẹhọ na. Inievo na a bi wuhrẹ Ebaibol kugbe ahwo udhuvẹ gbe ikpegbisoi, yọ Emọ-Uwuhrẹ Ebaibol ikpegbivẹ evaọ usu rai e jọ ividio rri jẹ gaviezọ kẹ ovuẹ Ekareghẹhọ na, yọ eva e were rai gaga.

Ẹkwotọ usi uwoma ota ukoko Iqaluit na ọ rro gaga, o no ẹwho Kimmirut rite ẹwho Grise Fiord. Ẹkwotọ na ọ rro vi akuava Nigeria. Ibuobu Emọ-Uwuhrẹ Ebaibol na a be rria eria nọ e rrọ obeva gaga evaọ ẹkwotọ na, fikiere o hae jọ bẹbẹ kẹ ae re a no ugbothabọ yena ze ti kuomagbe inievo na ru Ekareghẹhọ na.

Ọkpako ukoko Iqaluit na jọ nọ a re se Isaac Demeester ọ ta nọ: “Onana họ orọ ọsosuọ nọ Emọ-Uwuhrẹ Ebaibol mai nọ e be rria ikoliko nana nọ i thabọ gaga na a ro kuomagbe omai ru Ekareghẹhọ na fikinọ a sae rehọ ividio thuru si omai. Wọhọ oriruo, Ọmọ-Uwuhrẹ Ebaibol jọ nọ ọ be rria ẹwho Grise Fiord o zizie imane efa kugbe omariẹ, fikiere aimasoi a rehọ ividio thuru kugbe omai ru Ekareghẹhọ na evaọ ukoliko yena nọ o rrọ obeva gaga na.”

Ẹyao COVID-19 na o gine ru nọ eware buobu i ro nwene no, rekọ u fiobọhọ kẹ inievo ukoko na ruẹ nọ ewoma o re noi ze nọ ohwo o te nwene lele oghẹrẹ nọ eware e rrọ.

Oniọvo-ọmọtẹ jọ nọ a re se Kathy Burechailo ọ ta nọ: “Ma rehọ ifonu ta usi uwoma kẹ ahwo jọ nọ a rrọ ẹkwotọ mai na. Yọ ahwo jọ nọ a rrọ eria nọ e mai thabọ evaọ ẹkwotọ usi uwoma ota mai na a ginẹ gaviezọ kẹ omai gaga. Ahwo na a je kpohọ oria ovo ho fiki ẹyao nana, yọ a ginẹ gwọlọ oware nọ o rẹ kẹ ae omosasọ.”

Oniọvo-ọmọtẹ ọfa jọ nọ a re se Laura McGregor ọ ta nọ: “Eware e jọ gaga kẹ omai nọ e be rria Iqaluit na fikinọ ma jẹ sai kpohọ oria ovo ho, yọ ma jẹ ruawa gaga kpahe oghẹrẹ nọ eware e te jọ evaọ obaro. Rekọ mai ọvo ma ru ebrẹdi nọ uviuwou mai u ro ru Ekareghẹhọ na, yọ onana họ orọ ọsosuọ nọ ma ro ru ei. Eva e jẹ were omai gaga nọ ma je ru ei na, yọ u fiobọhọ kẹ omai riẹ nọ Ekareghehọ na o gwọlọ ikpeware evo ho. Ma yere Ọghẹnẹ inọ ma rẹ sai wo ebrẹdi avọ udi na lọlọhọ.”

Ebrọda Demeester ọ ta re nọ: “Dede nọ ẹyao COVID-19 na o ru nọ ma gbẹ be sai ro ru eware buobu kugbe ovao-dhe-ovao wọhọ epaọ anwẹdẹ hẹ, Ekareghẹhọ na u ru nọ inievo ukoko na a ro si kẹle ohwohwo vi epaọ anwẹdẹ no. A rẹ ruẹ obọ Ekareghẹhọ enukpe nana ha!”

Inievo Ukoko Iqaluit na a bi rẹro okenọ a te rọ bọ Ọgwa Uvie rai nọ eware i te woma no. Yọ ma riẹ nọ Jihova o ti fiobọhọ kẹ ae nọ a be dawo ẹgba rai kpobi re a ta usi uwoma kẹ ahwo nọ a rrọ ikoliko Canada nọ e rrọ obeva gaga na.—Iruẹru Ikọ 1:8.