Haklaken-naʼin 27 husi Kongregasaun Iqaluit iha Kanadá nia illa sira iha parte Ártiku halaʼo komemorasaun ba Jesus nia mate liuhusi vídeo call. Kongregasaun neʼe iha estudante Bíblia hamutuk naʼin-55, no estudante naʼin-12 mak konsege tuir komemorasaun no sira sente agradese tebes.

Kongregasaun Iqaluit nia territóriu mak hahú husi knua Kimmirut toʼo knua Grise Fiord, Kanadá nia parte norte liu. Territóriu neʼe nia luan mak toʼo 200.000.000 kilómetru quadradu. No tanba estudante Bíblia sira-neʼe hela dook husi kongregasaun, susar ba sira atu tuir Memoriál.

Katuas ida naran Isaac Demeester husi kongregasaun Iqaluit dehan: “Tinan neʼe mak dala primeiru, ami-nia estudante Bíblia bele hola parte iha programa Memoriál ho ami. Estudante Bíblia ida husi knua Grise Fiord konvida ema naʼin-haat tan atu haree programa Memoriál, entaun iha ema naʼin-lima husi mundu nia parte norte liu neʼebé konsege tuir Memoriál.

Tanba pandemia COVID-19, situasaun mós troka. Maski ida-neʼe hanetik irmaun-irmán sira iha kongregasaun Iqaluit atu haklaken hanesan baibain, maibé hodi adapta an ho situasaun foun, neʼe ajuda sira atu haklaken iha dalan seluk no mós hetan benefísiu.

Irmán Kathy Burechailo konta: “Ami uza telefone atu kontaktu ema iha área Ártiku. Haʼu kontaktu malu ho ema balu neʼebé hela iha fatin izoladu no kontente duni atu koʼalia. Sira labele sai no hela deʼit iha uma, sira presiza duni hetan anima no kmaan.

Irmán Laura McGregor dehan: “Hela iha fatin izoladu halo ami sente estrese tanba pandemia neʼe hamosu susar ekonomia no ami la hatene saida mak sei akontese iha futuru.” Nia hatutan tan: “Neʼe mak dala primeiru ba ami-nia família atu halo paun Memoriál nian. Ami iha tempu furak hamutuk. Neʼe ajuda ami atu agradese liután tanba serimónia neʼe mak simples deʼit, no ita sente kontente duni tanba bele uza sasán neʼebé fasil atu sosa.”

Irmaun Isaac Demeester dehan: “COVID-19 halo ami tenke dook malu iha dalan oioin, maski nuneʼe ami hakfodak atu haree katak durante tempu Memoriál, ami-nia kongregasaun sente besik ba malu liután. Ami sei nunka haluha Memoriál tinan neʼe nian.”

Kongregasaun Iqaluit hein namanas atu harii sira-nia Reuniaun-Fatin bainhira situasaun permite ida-neʼe. Maibé, nuʼudar sira hein, Ita hatene katak Jeová sei fó bensaun ba sira-nia hakaʼas an atu lori liafuan diʼak ba Kanadá nia parte norte liu, área ida neʼebé dook liu iha mundu!—Após 1:8.