Ŵapharazgi 27, ŵa mpingo wa Iqaluit ku Canada Arctic Archipelago, ŵakachita Chikumbusko kwizira pa pulogiramu ya pa kompyuta. Pa ŵasambiri ŵa Baibolo 55, ŵasambiri 12 ŵakawonelera pulogiramu ya Chikumbusko ndipo ŵakakondwa chomene na pulogiramu iyi.

Ŵanandi mwa ŵasambiri aŵa ŵakatenge ŵakwaniskenge yayi kwiza ku Chikumbusko. Ŵasambiri aŵa ŵakukhala ku vigaŵa vya ku mizi chomene vya mpingo uwu, ndipo chigaŵa chake ntchikuru masikweya kilomita 2 miliyoni kufuma ku Kimmirut kukafika ku Grise Fiord—uko nkhumpoto chomene kwa charu cha Canada.

Mubali Isaac Demeester, uyo ni mulara mu mpingo wa Iqaluit wakati: “Chaka chino nkhakwamba kuti ŵasambiri ŵa Baibolo ŵachite nase Chikumbusko. Msambiri munyake ku Grise Fiord wakachemerako ŵanyake ŵanayi kuti ŵawonelere lumoza pulogiramu iyi.”

Umo vinthu viliri pasono chifukwa cha muliri wa COVID-19, vyawovwira ŵabali na ŵadumbu mu mpingo wa Iqaluit kuti ŵawone uwemi wa kuŵa ŵakunozgeka kusintha.

Mudumbu Kathy Burechailo wakuti: “Tikapharazgira ŵanthu ŵa ku chigaŵa cha kumafumiro gha dazi gha Arctic pa foni. Vinthu vikenda makora chomene apo nkhadumbiskananga na ŵanthu ŵa ku vigaŵa vya ku mizi chomene mu chigaŵa chithu. Sono ŵanthu ŵakukhala waka panyumba ndipo ŵakukhumba kukhozgeka.”

Mudumbu Laura McGregor wakuti: “Chifukwa cha muliri uwu, ŵanthu ŵanandi kuno ku Iqaluit ŵali na phukwa, ŵakusuzgika maghanoghano kweniso ŵakusangana na masuzgo gha vyachuma ndipo ŵakumanya yayi kuti viŵenge wuli. Kakaŵa kakwamba kuti tiphike tekha chingwa cha pa Chikumbusko. Yikaŵa nyengo yakukondweska chomene kwa ise. Vikatovwira kuwona kuti Chikumbusko chikuchitika nadi mu nthowa yipusu, nakuti ntchipusu kusanga ivyo vikukhumbikwa.”

Mubali Demeester wakuti: “Nangauli muliri wa COVID-19 wapangiska kuti tileke kuwungana pamoza, kweni chakukondweska ntchakuti pa Chikumbusko vikaŵa nga kuti tose tawungana waka pamoza. Chikumbusko cha chaka chino ntchapadera chomene!”

Para vyose vyenda makora, Mpingo wa Iqaluit uzengenge Nyumba ya Ufumu munthazi umu. Kweni pasono, tikumanya kuti Yehova watumbikenge kuyezgayezga kwawo, apo ŵakupharazga makani ghawemi ku vigaŵa vyakutali vya kumpoto chomene kwa Canada. Vigaŵa ivi ni vimoza mwa vigaŵa vyakutali chomene vya charu chapasi!—Milimo 1:8.