Pa 6 August, 2020, khoti la Turkmen likuyeruzga kuti Mubali Eldor ndi Sanjarbek Saburov akaje mujeri kwa vyaka viŵi chifukwa chakuti njuŵi yawu yitiŵazomereza cha kusere usilikali. Eldor we ndi vyaka 21 ndipu mubali waki Sanjarbek we ndi vyaka 25. Khoti lingukana vo abali yaŵa angupempha kuti apangi apilu. Yaka nkhachiŵi kuti abali yaŵa aŵambi mulandu wakukana kusere usilikali.

Mu 2016, Mubali Sanjarbek Saburov wangukana mwaulemu kusere usilikali. Chifukwa cha venivi, iyu angumusaniya ndi mulandu ndipu angumuyeruzga kuti wakachitengi ukayidi wapanyumba kwa vyaka viŵi.

Chaka chakulondopu, mvurwa waki, Eldor, nayuso wangukana kusere usilikali. Ndipu angumuyeruzga kuti waperekengi 20 peresenti ya malipiru ngaki ku Boma kwa vyaka viŵi.

Mwakukoliyana ndi marangu nga ku Turkmen, munthu wangamangika so kachiŵi asani walutirizga kukana kusere usilikali. Mu April 2020, boma linguŵakambiya so kuti akasere usilikali. Abali yaŵa angukana kusere usilikali. Yiwu anguŵasaniya ndi mulandu ndipu anguŵayika mujeri.

Apapi a ŵana yaŵa angudandaula ukongwa kuti ŵana ŵawu aluta kujeri kweniso kuti asuzgikengi kusaniya ndalama. Awusewu asuzgika ndi nthenda ya msana ndipu ivi vichitiska kuti asuzgikengi kugwira ntchitu. Ŵana ŵenaŵa aŵawovyanga kulima nthonji yo waŵawovyanga. Sonu chifukwa chakuti ŵana ŵawu ŵe mujeri, vakusuzga kuti yiwu asaniyi ndalama zakuti ziŵawovyi pa umoyu. Mumalu mwaki, apapi sonu ndiwu akhumbika kuti awovyi ŵana ŵawu wo ŵe mujeri.

Ku Turkmenistan apereka cha ntchitu zinyaki ku ŵanthu wo akana kusere usilikali. Mwaviyo, abali achinyamata wo akana kusere usilikali chifukwa cha vo agomezga aja kujeri kwa chaka chimoza pamwenga vinayi. Kusazgiyapu Sanjarbek ndi mvurwa waki, ku Turkmenistan kwe Akaboni achinyamata 10 wo ŵe kujeri chifukwa chakukana kusere usilikali.

Tiziŵa kuti Yehova waŵatumbikengi abali ŵidu ŵenaŵa ku Turkmenistan chifukwa alutilizga kuja ndi chiganga. Mpha weyosi waku yiwu wangulutirizga kukumbuka vo Yehova wangulayizga Fumu Asa kuti: “Yimwi muje ndi nthazi kweniso mungagongowanga cha, pakuti mulondiyengi mphotu chifukwa cha ntchitu yinu.”—2 Mbiri 15:7.