Ke July ye August 2020, ata ediwak nditọete nnyịn iren ye iban ye mbon en̄wen ẹma ẹdiana kiet ẹse akamba mbono 2020.

Iketetie ibet akamba mbono nnyịn emi ibuotikọ ekedide ‘Ẹdat Esịt Kpukpru Ini’! Ẹkeduak ndinịm mbono emi ke mme Itie Mbono, an̄wambre, ye mme itie eken emi ẹsibọde ẹda ẹnịm mbono. Ẹkediomi ndinịm mbono emi ke idụt 240. Edi ke ntak udọn̄ọ coronavirus, Otu Emi Ẹsede Ẹban̄a Utom Mme Ntiense Jehovah ẹma ẹbiere yak ẹnam mbono emi ke vidio man kpukpru owo ẹkpese. Ọtọn̄ọde ke 1897, akpa ini ekedi emi nnyịn mîbohoke ọtọkiet idụk akamba mbono.

Brọda Kenneth Cook, Jr., emi edide owo Otu Emi Ẹsede Ẹban̄a Utom Mme Ntiense Jehovah, ọdọhọ ete: “Ke ini ikebierede ke owo idibohoke ọtọkiet idụk akamba mbono 2020, ima ikere ke ọkpọfọn inịm akamba mbono kiet emi nditọete ke ofụri ererimbot ẹdikemede ndidụk ke ukem ini. Ima idiọn̄ọ ke ikenyene n̄kpọ nte ọfiọn̄ inan̄ kpọt ndida n̄kabade mbono emi ke ediwak usem. Ẹsida n̄kpọ nte isua kiet m̀mê akande oro ẹnam utọ utom emi. Edi esịt ama enen̄ede enem nnyịn ndikụt nte ẹsịnde akpa ikpehe mbono emi ke n̄kpọ nte usem 400 ke July 6, 2020. Imọdiọn̄ọ ke ẹyesịn mbono emi ẹsịm usem 511.”

Sista kiet emi ọbọkde nditọ ita ikpọn̄ etịn̄ ufọn emi imọ ye nditọ imọ idiade ke mbono emi. Enye ọdọhọ ete: “Kpa ye oro nnyịn mîtiehe kiet ye nditọete nnyịn idụk mbono emi, nte ẹnịmde enye enen̄ede ọfọn ye nditọ mi. Sia isede mbono emi ke ikpehe ke ikpehe, emi anam mmọ ẹnen̄ede ẹkpan̄ utọn̄. Ini kiet ekededi emi mmọ ẹyomde ndidaha nda esisịt, imesituak ida tutu mmọ ẹfiak ẹditetie mbemiso ifiakde itọn̄ọ ibre. Emi iyakke n̄kpọ ndomokiet atak mmọ. Mbono Friday ama owụt ke nditọ ẹtie nte idan̄. Kpa nte anade ẹket idan̄ ọfọn man ẹtọ nnennen itie emi ẹyomde, ana ẹkpep nditọwọn̄ ndinam n̄kpọ Jehovah man mmọ ẹkop inemesịt. Mbono emi isede nte vidio mi an̄wam nnyịn inam oro.”—Psalm 127:4.

Mme ọkọmbụk n̄kpọntịbe ke nsio nsio itie ẹtịn̄ ediwak n̄kpọ ẹban̄a mbono emi. Ke uwụtn̄kpọ, Brọda Robert Hendriks, emi esede enyịn ke Itieutom Emi Ẹsinamde Mme Owo Ẹdiọn̄ọ Se Nnyịn Inamde ke United States, ọdọhọ ete: “Ata ediwak mme ọkọmbụk n̄kpọntịbe ẹwet n̄kpọ ẹban̄a mbono emi. Mmọ ẹdọhọ ke nte isiode mbono emi ke vidio yak mme owo ẹtie ke ufọk mmọ ẹse owụt ke ida uwem ke ata akpan n̄kpọ.”

Akamba mbono 2020 emi ibuotikọ ekedide ‘Ẹdat Esịt Kpukpru Ini’! edi usụn̄ en̄wen emi Jehovah owụtde ke imọ idi Akwa Anditeme nnyịn.—Isaiah 30:20.