Iti bulan ti Hulio ken Agosto 2020, minilion a kakabsattayo ken interesado a tattao ti sangsangkamaysa a nagbuya iti programa ti kombension iti 2020.

Ti “Kanayon nga Agragsakkayo”! a Kombension a segseggaan ti adu ket nayeskediul a maangay kadagiti Assembly Hall, arena, convention center, ken istadium iti 240 a pagilian. Tapno maprotektaran ti salun-at dagiti umatender, inkeddeng ti Bagi a Manarawidwid a sukatan dagitoy a rehional a kombension iti virtual a kombension iti intero a lubong. Daytoy ti kaunaan a kombension sipud idi 1897 a saan nga inangay ti organisasion ti “live” a kombension.

Kinuna ni Kenneth Cook, Jr. a miembro ti Bagi a Manarawidwid: “Idi nakanselar dagiti rehional a kombension, inkeddengmi nga angayen ti maysa nga internasional nga okasion a maatenderan ti amin iti agpapada a petsa. Ammomi a masapul a maisagana ti programa iti ginasut a lengguahe iti kurang nga uppat a bulan. Gagangay a makatawen wenno nasursurok pay a maiplano ken makompleto ti kastoy a kita ti proyekto. Naragsakankami unay idi mabuyan ti umuna a paset ti programa idi Hulio 6, 2020, iti agarup 400 a lengguahe. Ekspektarenmi a maipabuya ti programa iti 511 a lengguahe!”

No maipapan kadagiti pagsayaatan ti virtual a programa, imbaga ti maysa kadagiti kakabsattayo a maysa nga agsolsolo nga ina nga addaan iti tallo nga annak: “Mailiwkami kadagiti gagayyem, ngem nagsayaatan dayta dagiti ubbing. Gapu ta nabingaybingay ti programa iti ababa a tiempo, nakapagpokus dagiti ubbing. No kasapulanda ti ag-break, i-pause-mi laeng. Mabuyami ti intero a programa. Impaganetget ti sesion iti Biernes a dagiti annak ket kas kadagiti pana a masapul a maiturong iti naragsak ken makapnek a biag iti panagserbi ken Jehova. Nakatulong daytoy a virtual a programa tapno maaramidko dayta.”—Salmo 127:4.

Ti nakallalagip a virtual a kombension ket naginteresan ti international media. Kas pagarigan, kinuna ni Robert Hendriks a mangay-aywan kadagiti aktibidad ti Public Information Desk iti United States: “Nagadu a journalist ti nagsurat maipapan iti daytoy a virtual a kombension. Impadamagda nga us-usaren ti organisasiontayo ti teknolohia tapno maibrodkas ti programa ti kombension ken maprotektaran ti salun-at dagiti agbuya.”

Ti 2020 “Kanayon nga Agragsakkayo”! a Kombension impakitana kadatayo ti baro ken makapagagar a pamay-an ti panangisuro ni Jehova, ti Naindaklan nga Instruktortayo.—Isaias 30:20.