Evaọ amara Ahrẹ gbe Aria 2020, inievo-emezae gbe emetẹ mai nọ i te ima buobu, gbe ahwo buobu nọ a wo isiuru kpahe Ebaibol na a rri okokohọ ubrotọ 2020 na oke ọvona.

Ma je rẹro Okokohọ Ubrotọ “Hae Ghọghọ Ẹsikpobi”! na gaga, yọ evaọ Egwa Ikokohọ gbe eria sa-sa ma maa fihọ vẹre nọ ma te jọ ru ai evaọ ekwotọ 240. Rekọ re ma siọ uzuazọ ahwo nọ a hae te nya ba efihọ ọza, Utu Ẹruorote na o tẹ jiroro nọ a dhugbe rekọdo okokohọ na re a jọ akpọ na soso rri rie evaọ JW Broadcasting. No anwọ ukpe 1897 ze, onana họ orọ ọsosuọ nọ ahwo a ro kokohọ oria ovo ru okokohọ ubrotọ họ evaọ ukoko na.

Brọda Kenneth Cook, Jr. nọ ọ rrọ omọvo Utu Ẹruorote na ọ ta nọ: “Nọ ma jiroro nọ ma ti gbe ru okokohọ ubrotọ na evaọ Egwa Ikokohọ gbe eria efa ha, ma tẹ ma omaa nọ ma re ru okokohọ ọvo nọ a rẹ jọ akpọ na soso rri evaọ oke ovona. Ma riẹ nọ o tẹ gwọlọ nọ a fa eme okokohọ na fihọ evẹrẹ nọ i te udhusoi buobu evaọ oware wọhọ emerae esa gbọ ọvo. Wọhọ epanọ o rẹ mae jọ, oghẹrẹ iruo itiena e rẹ rehọ te ẹgbukpe hayo tubẹ vrẹ ere dede nọ a rẹ rọ ma omaa iruo na je ru ai re. Fikiere eva e were omai gaga nọ ma siobọno abọ ọsosuọ okokohọ na evaọ enwenọ evẹrẹ egba ene (400) evaọ Ahrẹ 6, 2020. Ma rẹro nọ a te fa okokohọ na fihọ evẹrẹ egba isoi gbe ikpegbọvo (511) soso!”

Oniọvo-ọmọtẹ jọ nọ ọye ọvo ọ be yọrọ emọ esa riẹ ọ ta kpahe irere nọ a wo no okokohọ nana ze inọ: “Ginọ uzẹme nọ o hae te were omai re ma ru okokohọ na kugbe inievo-emezae gbe emetẹ mai, rekọ okokohọ nana o kiehọ kẹ emọ na gaga. Nọ orọnọ ma bi rri rie omomoto na, u bi fiobọhọ kẹ emọ na sae gaviezọ ziezi. Nọ o tẹ gwọlọ nọ a rẹ kpama, ma sae da ividio na ji. Oware ovuọvo u bi vo ai vievie he. Abọ Edisoi-Oka o dhesẹ nọ emọ e wọhọ ese nọ o gwọlọ nọ a rẹ riẹ sa ziezi re a sae rọ uzuazọ rai gọ Jihova avọ evawere. Okokohọ nana nọ a rekọdo na o bi fiobọhọ kẹ omẹ ru onana ziezi.”—Olezi 127:4.

Eniyẹrẹ evaọ akpọ na soso a muẹrohọ okokohọ ubrotọ obọdẹ mai nana nọ ma rehọ JW Broadcasting ru na gaga. Wọhọ oriruo, Robert Hendriks nọ o wuzou ẹko-iruo iyẹrẹ-enẹ nọ a re se Public Information Desk evaọ United States ọ ta nọ: “Eniyẹrẹ buobu a kere iku kpahe okokohọ ubrotọ nọ ma rehọ JW Broadcasting na. A jọ iku rai ta kpahe epanọ ukoko na o be rọ rehọ itanẹte ru okokohọ na ghele epanọ eware e rrọ evaọ akpọ na, yọ a bi ru ei evaọ oghẹrẹ nọ ohwo kpobi ọ sae gbẹ rọ jọ omakọkọ.”

Oghẹrẹ nọ ma ro ru Okokohọ Ubrotọ “Hae Ghọghọ Ẹsikpobi”! ọrọ 2020 na u ru omai ruẹ obọdẹ edhere ọkpokpọ nọ Jihova o ro dhesẹ nọ ọye họ Owuhrẹ Ologbo Oride mai na.—Aizaya 30:20.